నందమూరి బాలకృష్ణ (Balakrishna) హీరోగా గోపీచంద్ మలినేని దర్శకత్వంలో తెరకెక్కిన వీర సింహారెడ్డి ప్రీ రిలీజ్ ఈవెంట్‌ ఒంగోలులో నిర్వహిస్తున్నట్లు మేకర్స్ తెలిపిన సంగతి తెలిసిందే. అయితే ఈ కార్యక్రమానికి పోలీసులు అనుమతి నిరాకరించారు. ఒంగోలులో బాలయ్య సినిమా వేడుక చూసేందుకు చుట్టుపక్క జిల్లాల నుంచి అభిమానుల తాకిడి ఎక్కువగా వుంటుందని పోలీసులు చెబుతున్నారు. ఈ నేపథ్యంలో ఒంగోలులో ప్రీ రిలీజ్ ఈవెంట్ నిర్వహిస్తే ట్రాఫిక్‌కు తీవ్ర అంతరాయాలు కలుగుతాయని , ఈ క్రమంలో నగరం బయట కార్యక్రమాన్ని పెట్టుకోవాలని పోలీసులు సూచించారు. దీంతో వీరసింహారెడ్డి యూనిట్ ప్రత్యామ్నాయ వేదికను అన్వేషించే పనిలో పడింది.

ఏపీలో సభలు, సమావేశాలపై నిషేధం:

అయితే ఇటీవల టీడీపీ అధినేత చంద్రబాబు నాయుడు నిర్వహించిన కందుకూరు, గుంటూరు సభల్లో తొక్కిసలాట చోటు చేసుకుని 11 మంది ప్రాణాలు కోల్పోయిన సంగతి తెలిసిందే. అప్పటి నుంచి ఏపీలో భారీ బహిరంగ సభ, ఇతర ఈవెంట్స్ అంటే ప్రభుత్వం, పోలీసులు వణికిపోతున్నారు. అనుమతులు ఇచ్చాక.. జరగరానిది జరిగితే అనవసరంగా విమర్శలు ఎదుర్కోవాల్సి వస్తుందని.. పైగా విలువైన ప్రాణాలను కోల్పోవాల్సి వస్తుందని భయపడుతున్నారు. అటు ప్రభుత్వం కూడా తొక్కిసలాట ఘటన తర్వాత రోడ్ షోలు, బహిరంగ సభలు, సమావేశాలపై నిషేధం విధించిన సంగతి తెలిసిందే. ప్రత్యేక పరిస్ధితుల్లో ప్రభుత్వ అనుమతి తీసుకున్న తర్వాతే అలాంటి కార్యక్రమాలు పెట్టుకోవాలని జీవో జారీ చేసింది.

ఒంగోలులో బాలయ్య అభిమానులు, బాబు సామాజికవర్గం ఎక్కువే:

మరోవైపు.. కక్ష సాధింపు చర్యల్లో భాగంగానే బాలయ్య ప్రీ రిలీజ్ ఈవెంట్‌కు ప్రభుత్వం అనుమతులు రద్దు చేసిందంటూ కొందరు ఆరోపిస్తున్నారు. టీడీపీ అధినేత చంద్రబాబుకు బాలయ్య స్వయానా వియ్యంకుడు, పైగా ఆ పార్టీ ఎమ్మెల్యే కావడంతోనే జగన్ సర్కార్ ఇలాంటి నిర్ణయం తీసుకుందంటూ కొందరు విమర్శిస్తున్నారు. దీనికి తోడు ఒంగోలులో బాలయ్య సామాజిక వర్గం, తెలుగుదేశం మద్ధతుదారులు ఎక్కువ. ఇవన్నీ దృష్టిలో పెట్టుకునే ప్రభుత్వం వ్యూహాత్మకంగా వ్యవహరించిందన్న కామెంట్స్ వినిపిస్తున్నాయి.

సంక్రాంతికి వీరసింహారెడ్డి :

ఇకపోతే.. మైత్రి మూవీ మేకర్స్ పతాకంపై రూపొందుతున్న వీరసింహారెడ్డిలో బాలయ్య సరసన శృతి హాసన్ హీరోయిన్‌గా నటిస్తున్నారు. సంక్రాంతి కానుకగా ఈ సినిమా ప్రేక్షకుల ముందుకు రానుంది. ఈ మూవీలో హానీ రోజ్, వరలక్ష్మీ శరత్ కుమార్, నవీన్ చంద్ర, మురళీ శర్మ, ఈశ్వరీ రావులు కీలక పాత్ర పోషిస్తున్నారు. ఇక కన్నడ నటుడు దునియా విజయ్ ఈ చిత్రంలో విలన్‌గా నటిస్తున్నారు.