சமீபத்தில் சிம்பு பண மதிப்பிழப்பு குறித்த பாடல் ஒன்றை வெளியிட்டார் என்பது அனைவரும் தெரிந்ததே. 'தட்றோம் தூக்றோம்' என்று தொடங்கும் இந்த பாடலில் பணமதிப்பிழப்பு நடவடிக்கையால் ஏற்பட்ட பொதுமக்களின் சிரமங்கள் கடுமையான வார்த்தைகளால் தோலுரிக்கப்பட்டிருந்தது.

கபிலன் வைரமுத்து எழுதிய இந்த பாடலில்

"ஏழை வீட்டில் இருப்பதெல்லாம் சிவப்புப் பணமடா,
குருவிபோல சேர்த்த காசு கையில இல்லைடா
நாட்டை மாத்த வேணுமின்னு நீங்க நினைச்சா,  
கோட்டு போட்ட குண்டர்களின் சங்க பிடிங்கடா

போன்ற வரிகள் பெரும் வரவேற்பை பெற்றது.

இந்த பாடல் இணையதளங்களில் வைரலாகி மிக வேகமாக பரவியதை அடுத்து சிம்புவுக்கு எதிராக போராட்டம் நடத்த பாஜகவினர் திட்டமிட்டுள்ளதாக செய்திகள் வெளிவந்து கொண்டிருக்கின்றது. இதனால் சென்னை தி.நகர் மாசிலாமணி தெருவில் உள்ள சிம்பு வீட்டிற்கு போலீஸ் பாதுகாப்பு போடப்பட்டிருப்பதாக தகவல்கள் வெளிவந்துள்ளது.

'மெர்சல்' படத்திற்கு எதிர்ப்பு தெரிவித்து விஜய்க்கு தேசிய அளவில் புகழ் பெற்று கொடுத்த பாஜகவினர் அடுத்து சிம்புவையும் தேசிய அளவில் பிரபலப்படுத்த முயற்சி செய்கிறார்களா? என்ற கேள்வியே பலரது மத்தியில் எழுந்துள்ளது.