ఫ్లైట్ ఎక్కనంటున్న వర్మ.. వెళ్లిపోవాలంటున్న ఖాకీలు
- IndiaGlitz, [Sunday,April 28 2019]
టాలీవుడ్ ప్రముఖ దర్శకుడు రామ్గోపాల్ వర్మ విజయవాడలో నడిరోడ్డుపై ప్రెస్మీట్ పెడుతున్నట్లు ట్విట్టర్ ద్వారా ప్రకటించడంతో రంగంలోకి దిగిన పోలీసులు అదుపులోకి తీసుకున్నారు. దీంతో ఆర్జీవీ తీవ్ర అసంతృప్తికి లోనయ్యారు. ప్రస్తుతం పోలీసు కస్టడీలో ఉన్నట్లు ట్విట్టర్ వేదికగా ఆయనే ఓ వీడియోను విడుదల చేశారు.
వీడియో సారాంశం..
కారులో ఉన్న మమ్మల్ని కిందికి దింపేసి బలవంతంగా వేరే కారులోకి ఎక్కించేసి.. ఎయిర్‌పోర్టులోకి తీసుకొచ్చిపడేశారు. విజయవాడ రావడానికి వీళ్లేదు.. ఇక్కడ మకాం కుదరదని పోలీసులు చెబుతున్నారు. పోలీసులు ఇలా ఎందుకు చేస్తున్నారో నాకు అర్థం కాలేదు. పోలీసులకు రెస్పాన్సిబిలిటీ ఉంటుంది.. కానీ విజయవాడ రావడానికి వీల్లేదు.. విజయవాడ ఎయిర్‌పోర్టులో ఎక్కడా ఉండటానికి వీల్లేదని పోలీసులు చెబుతున్నారు. అసలు ఎందుకిలా చేస్తున్నారో నాకు మాత్రం ఇప్పటికీ అర్థం కావట్లేదు.. నేను పోలీసులను ప్రశ్నిస్తున్నప్పటికీ సమాధానమివ్వట్లేదు అని ఆర్జీవీ తన వీడియోలో పేర్కొన్నారు.
ఫ్లైట్ ఎక్కేది లేదంటున్న ఆర్జీవీ!
ఇదిలా ఉంటే.. విజయవాడ నుంచి ‘లక్ష్మీస్ ఎన్టీఆర్’ చిత్రబృందాన్ని పోలీసులు ఎయిర్‌పోర్టుకు కారులో తరలించారు. హైదరాబాద్‌కు వెళ్లిపోవాలని పోలీసులు పట్టుబట్టినప్పటికీ ఆర్జీవీ మాత్రం ఫ్లైట్ ఎక్కేది లేదని మొండికేస్తున్నారు. ఎయిర్‌పోర్టుకు ఆర్జీవీ అభిమానులు పెద్ద ఎత్తున చేరుకున్నారు. ఇదిలా ఉంటే ఉద్రిక్త పరిస్థితులు నెలకొనే అవకాశాలు మెండుగా ఉన్నాయి. కాగా ఈ ఘటనకు సంబంధించి మరింత సమాచారం తెలియాల్సి ఉంది.