PM Modi Photo: అమ్మా నిర్మలమ్మ .. ఇవిగో 'మోడీజీ ఫోటోలు', కానీ ప్లేసే మారింది
- IndiaGlitz, [Saturday,September 03 2022]
గత కొంతకాలంగా తెలంగాణలో బీజేపీ - టీఆర్ఎస్ మధ్య ఉప్పూనిప్పుగా పరిస్ధితి వున్న సంగతి తెలిసిందే. కేసీఆర్ జాతీయ రాజకీయాల్లోకి వెళ్లే ఆలోచనలు చేస్తుండటం, బీజేపీ, ప్రధాని మోడీపై విమర్శల నేపథ్యంలో రాజకీయం వేడెక్కింది. ఇక ఇటీవల ఢిల్లీ లిక్కర్ స్కామ్‌లో కేసీఆర్ కుమార్తె కవిత వుందంటూ వార్తలు బయటకు రావడం, బండి సంజయ్, రాజాసింగ్‌ల అరెస్ట్‌లతో .. బీజేపీ- టీఆర్ఎస్‌లు ఇక తాడోపేడో తేల్చుకోవాలన్నంత స్థాయిలో తలపడుతున్నాయి.
టీఆర్ఎస్- బీజేపీల మధ్య గ్యాప్ పెంచిన నిర్మలా సీతారామన్:
ఇలాంటి పరిస్ధితుల్లో తెలంగాణ పర్యటనకు వచ్చిన కేంద్ర ఆర్ధిక మంత్రి నిర్మలా సీతారామన్ అగ్నికి ఆజ్యం పోశారు. కేసీఆర్ ప్రభుత్వంపై ఘాటు విమర్శలు చేసిన నిర్మలమ్మ.. ఓ రేషన్ షాపు పరిశీలనకు వెళ్లి ప్రధాని మోడీ ఫోటో ఎందుకు పెట్టలేదంటూ కలెక్టర్‌పై ఆగ్రహం వ్యక్తం చేశారు. దీనికి టీఆర్ఎస్ నేతల నుంచి అదే స్థాయిలో కౌంటర్ వచ్చింది.
అమ్మా నిర్మలమ్మా ఇదిగో మోడీ ఫోటో:
అయితే నిర్మల చేసిన హడావుడితో ప్రధాని మోడీ ఫోటోలు వెలిశాయి. కానీ రేషన్ దుకాణం వద్ద కాదు.. మరో చోట ప్రత్యక్షమయ్యాయి. అది కూడా ఎక్కడో కాదు. ఎల్పీజీ సిలిండర్ల మీద. వినియోగదారులకు డెలివరీ చేసేందుకు సిలిండర్ల లోడ్‌తో ఓ ఆటో వెళ్తోంది. దాని నిండా సిలిండర్లు వున్నాయి. వాటికి ప్రధాని నరేంద్ర మోడీ ఫోటోలు అతికించి వున్నాయి. అంతేకాదు.. ‘‘మోడీ జీ రూ.1105’’ అని రాసి వుంది. ఈ ఫోటోలను నెటిజన్లు, టీఆర్ఎస్ శ్రేణులు వైరల్ చేస్తున్నాయి. ‘‘అమ్మా నిర్మలమ్మ మోడీ ఫోటో చూసుకో అమ్మా అంటూ కామెంట్ చేస్తున్నారు. మరి దీనికి బీజేపీ నేతలు ఎలా స్పందిస్తారో వేచి చూడాలి.