சூர்யாவுக்கு ஜோடியாகும் மிஷ்கின் பட நாயகி!
- IndiaGlitz, [Sunday,December 13 2020]
சூர்யா நடித்த சூரரைப்போற்று திரைப்படம் சமீபத்தில் வெளியாகி மிகப்பெரிய வெற்றி பெற்ற நிலையில் அடுத்ததாக அவர் பாண்டியராஜன் இயக்கத்தில், சன் பிக்சர்ஸ் தயாரிப்பில் உருவாக உள்ள திரைப்படத்தில் நடிக்க உள்ளார் என்பதும் அந்த படத்தை முடித்துவிட்டு வெற்றிமாறனின் ’வாடிவாசல்’ படத்தில் நடிக்க உள்ளார் என்பதும் தெரிந்ததே.
இந்த நிலையில் தற்போது கௌதம் மேனன் இயக்கத்தில் உருவாகி வரும் ’நவரசா’ என்ற ஆந்தாலஜி திரைப்படத்தில் சூர்யா நடித்து வருகிறார் என்பதும் சூர்யாவின் பகுதி படப்பிடிப்பு சமீபத்தில் நடைபெற்றது என்பதும் தெரிந்ததே. மேலும் படப்பிடிப்பில் அவர் கலந்து கொண்ட புகைப்படங்களும் சமூகவலைதளத்தில் வைரலானது.
இந்த நிலையில் ’நவரசா’ ஆந்தாலஜி படத்தில் சூர்யாவுக்கு ஜோடியாக ப்ரயாகா மார்ட்டின் நடிக்க உள்ளதாக தகவல்கள் உறுதி செய்யப்பட்டுள்ளது. இவர் ஏற்கனவே மிஷ்கின் இயக்கத்தில் உருவான ’பிசாசு’ படத்தில் நாயகியாக நடித்தவர் என்பது குறிப்பிடதக்கது.
கார்த்திக் இசையமைத்து வரும் ‘நவரசா’ ஆந்தாலஜி திரைப்படம் அடுத்த ஆண்டு ஏப்ரலில் நெட்பிளிக்ஸில் வெளியாக உள்ளது என்பது குறிப்பிடத்தக்கது.