இப்படியொரு கையெழுத்தா? நெட்டிசன்களை மிரள வைத்த அரசு அதிகாரி!
- IndiaGlitz, [Wednesday,March 23 2022]
ஒப்புதல் அளிக்கும் விதமாக நாம் அனைவரும் கையெழுத்திடும் பழக்கத்தை வைத்துள்ளோம். இதில் ஒருவருடைய கையெழுத்தைப் பார்த்து நெட்டிசன்களே மிரண்டுபோய் கமெண்ட்ஸ்களை பதிவிடும் நிகழ்வு அரங்கேறியிருக்கிறது.
வித்தியாசமான பல கையெழுத்துகளைப் பார்க்கும் சந்தர்ப்பம் நமக்கு ஏற்பட்டு இருக்கலாம். ஆனால் அசாம் மாநிலம் கவுகாத்தியில் உள்ள அரசு மருத்துக் கல்லூரியில் எலும்பியல் துறையில் பதிவாளராக இருந்துவரும் அரசு அதிகாரி ஒருவர் போட்டிருக்கும் கையெழுத்து பலரையும் ஆச்சர்யப்பட வைத்திருக்கிறது. பொதுவாக மருத்துவர்களின் கையெழுத்துதான் நமக்கு புரியாது என்று நினைத்திருந்தோம். ஆனால் மருத்துவக் கல்லூரியில் வேலைப் பார்க்கும் பதிவாளரும் இப்படித்தானா? என்று ஆச்சர்யப்படும் அளவிற்கு அந்த அதிகாரி கையொப்பம் இட்டிருக்கிறார்.
இதைப் பார்த்த நெட்டிசன்கள் அரசு அதிகாரியின் கையெழுத்தை இணையத்தில் வைரலாக்கி வருகின்றனர். மேலும் பார்ப்பதற்கு இந்தக் கையெழுத்து முள்ளம் பன்றி போலவே இருக்கிறது என்றும், இன்னொரு முறை இந்தக் கையெழுத்தை அவரால் சரியாகப் போட முடியுமா? என்றும் இந்தக் கையெழுத்து போடுவதற்கு எவ்வளவு நேரம் ஆகும்? என்பது போன்ற கமெண்ட்ஸ்களை பதிவிட்டு வருகின்றனர். கடந்த 4 ஆம் தேதி போடப்பட்ட இந்தக் கையெழுத்து தற்போது இணையத்தில் வைரலாகி பலரையும் ஆச்சர்யப்படுத்தி இருக்கிறது.