கொரோனா பரவல் தடுப்புக்காக உலக நாடுகள் பல்வேறு நடவடிக்கைகளை மேற்கொண்டு வருகின்றன. உலகில் பல்வேறு நாடுகளின் சிறைகளிலும் கொரோனா நோய்த்தொற்று பரவிவரும் சூழலில் பிலிப்பைன்ஸ் நாடு நெருக்கமான சிறைகளில் உள்ள 10 ஆயிரம் சிறை கைதிகளை விடுவித்து இருக்கிறது.

கொரோனாவுக்கு எதிரான செயல்பாடுகளில் பிலிப்பைன்ஸ் 10 ஆயிரம் சிறை கைதிகளை விடுவித்து உள்ளதாக அந்நாட்டின் உச்ச நீதிமன்ற அதிகாரி ஒருவர் தெரிவித்துள்ளார். நெருக்கமான சூழல்களில் அடைக்கப்பட்டுள்ள சிறை கைதிகளை விடுவிடுக்கும்படி அந்நாட்டின் நீதிமன்றம் அறிவுறுத்திய நிலையில் தற்போது கைதிகள் விடுவிக்கப்பட்டதாகவும் கூறப்படுகிறது. விடுவிக்கப்பட்ட கைதிகள் பெரும்பாலும் 6 மாதத் தண்டனைக்கு குறைவான தண்டனையைப் பெற்றவர்கள் எனவும் தெரியவந்துள்ளது. தகுதிவாய்ந்த முதியவர்கள் மற்றும் நோய் வாய்ப்பட்ட கைதிகளும் விடுவிக்கப் பட்டுள்ளார்கள்.

மார்ச் 17 ஆம் தேதி முதல் ஏப்ரல் 29 வரை படிப்படியாக சிறை கைதிகள் விடுவிக்கப்பட்டதாகவும் அந்நாட்டு அரசு அறிக்கை வெளியிட்டுள்ளது. உள்கட்டமைப்பு வசதி குறைந்த பல சிறைகளில் நெருக்கமான எண்ணிக்கையில் கைதிகள் அடைக்கப்பட்டள்ளனர். எனவே சிறைச்சாலைகளில் உடல் ரிதியான சமூக இடைவெளியை கடைப்பிடித்தல் என்பது சாத்தியமே இல்லை என்பதால் தற்போது பல நாடுகள் தங்களது சிறை கைதிகளை விடுவித்து வருகின்றனர். பிலிப்பைன்ஸின் சில சிறைச்சாலைகளில் மட்டுமே கொரோனா பாதிப்பு பதிவாகியிருக்கின்றன என்பதும் குறிப்பிடத்தக்கது.

பிலிப்பைன்ஸ் தலைநகர் மணிலாவில் உள்ள கியூசன் சிட்டி சிறைச்சாலை கூட்டம் மற்றும் நெரிசலானதாகவும் கருதப்படுகிறது. அந்நாட்டில் உள்ள செபு தீவில் 348 சிறை கைதிகளுக்கு நோய்த்தொற்று ஏற்பட்டுள்ளது என்பதும் குறிப்பிடத்தக்கது.