ద‌క్షిణాదిలోనే కాకుండా హిందీ చిత్ర ప‌రిశ్ర‌మ‌లోనూ ఎన్నో సూపర్ హిట్ సినిమాలను తన కెమెరా పనితనంతో గొప్ప చిత్రాలుగా మలచిన ఘ‌న‌త‌ సినిమాటోగ్రాఫర్ పి.సి.శ్రీరామ్ సొంతం. ‘గీతాంజలి’ (1989) సినిమా ద్వారా తెలుగు ప్రేక్ష‌కుల‌కు నేరుగా ప‌రిచ‌య‌మైన శ్రీ‌రామ్‌.. త‌న ప్ర‌తిభాపాట‌వాల‌తో స‌మ్మోహ‌న‌ప‌రిచారు. ఆ తర్వాత ‘శుభసంకల్పం’, ‘ఖుషి’, ‘కేక’, ‘ఇష్క్’ లాంటి సినిమాలకు పని చేసారు. వీటిలో ‘కేక’ మినహాయిస్తే.. మిగిలిన సినిమాలన్నీ సూపర్ హిట్ మూవీస్ కావడం విశేషం.

తెలుగులో విజయవంతమైన సినిమాటోగ్రాఫర్‌గా మంచి ట్రాక్ రికార్డు ఉన్న పి.సి.శ్రీరామ్.. తాజాగా నందమూరి కళ్యాణ్ రామ్, తమన్నా జంటగా జయేంద్ర దర్శకత్వంలో రూపొందిన ‘నా నువ్వే’కి కెమెరామాన్‌గా పనిచేసారు. రొమాంటిక్ కామెడీ ఎంటర్‌టైనర్‌గా తెరకెక్కిన ఈ సినిమా జూన్ 14న ప్రేక్షకుల ముందుకు రానుంది. మరి పి.సి.శ్రీరామ్ హస్తవాసితోనైనా.. విజయం కోసం ఎదురుచూస్తున్న కళ్యాణ్ రామ్‌కి ఆ విజయం వరిస్తుందేమో చూడాలి.