మెగాస్టార్ చిరంజీవికి తమ్ముడు, జనసేన అధినేత పవన్ కళ్యాణ్ పుట్టిన రోజు శుభాకాంక్షలు తెలిపారు. అన్నయ్య చిరంజీవి గారు తన స్ఫూర్తి ప్రదాత అని పవన్ పేర్కొన్నారు. అన్నావదినలు తనకు తల్లిదండ్రులతో సమానమని వెల్లడించారు. ఒక సాధారణ మధ్య తరగతి కుటుంబంలో పుట్టిన ఒక సామాన్యుడు.. అసామాన్యుడిగా ఎదిగి ఎందరికో స్ఫూర్తిగా నిలిచారని పవన్ పేర్కొన్నారు. తెలుగువారు సగర్వంగా చిరంజీవి మావాడు అని చెప్పుకొనేలా తనను తాను మలచుకున్నారన్నారు.

‘‘అన్నయ్య చిరంజీవి నా స్ఫూర్తి ప్రధాత. నాకు జన్మిచ్చిన నా తల్లిదండ్రులను ఎంత ఆరాధిస్తానో నా అన్నయ్య చిరంజీవిని కూడా అంతలా పూజ్య భావంతో అమితంగా ప్రేమిస్తాను. నా అన్నయ్య చిరంజీవి, సురేఖ వదిన నాకు తల్లిదండ్రులతో సమానం. నేను అన్నయ్య చేయిపట్టి పెరిగాను, ఒక్కమాటలో చెప్పాలంటే అన్నయ్యే నా మొదటి గురువు.. అమ్మలా లాలించారు.. నాన్నలా మార్గదర్శిగా నిలిచారు. కృషితో నాస్తి దుర్భిక్షం అన్న పెద్దల మాటలు అన్నయ్యను చూస్తే నిజమనిపిస్తాయి. అంచెలంచెలుగా ఎదిగి కోట్లాదిమంది అభిమానులు, శ్రేయోభిలాషుల గుండెల్లో చిరస్థాయి స్థానాన్ని సంపాదించారు. తెలుగువారు సగర్వంగా 'చిరంజీవి మావాడు' అని చెప్పుకొనేలా తనను తాను మలచుకున్నారు. ఒక సాధారణ మధ్యతరగతి కుటుంబంలో పుట్టిన ఒక సామాన్యుడు అసామాన్యుడుగా ఎదిగి, నా లాంటి వారు ఎందరికో స్ఫూర్తి ప్రధాతగా నిలిచారు.

కష్టాన్ని నమ్ముకున్నారు.. సముచిత స్థానానికి చేరుకున్నారు. చిన్నపాయగా ఉద్భవించే నది అఖండ రూపాన్ని సంతరించుకున్నట్లు అన్నయ్య చిరంజీవి ఎదిగారు. ఆయనలా నటుడవుదామని, ఆయనలా అభినయించాలని కొందరు స్ఫూర్తి పొందితే.. ఆయనలా సేవ చేయాలని మరెందరో ప్రేరణ పొందారు. తన అభిమానులకు 'సేవ' అనే సత్కార్యానికి దారిచూపారు, ఎందరో ఆ దారిలో పయనిస్తూ నేడు సమాజంలో అనేక కార్యక్రమాలు చేపడుతున్నారు. ఆపన్నులకు అండగా ఉంటున్నారు.. అటువంటి కృషీవలునికి తమ్ముడిగా పుట్టడం నా అదృష్టం. నేడు చిరంజీవి గారి జన్మదినం. ఈ సందర్భంగా ఆయనను తెలుగు వారందరూ ఆశీర్వదించాలని కోరుకుంటున్నాను. చిరంజీవి గారికి చిరాయువుతో కూడిన సుఖశాంతులు ప్రసాదించాలని ఆ భగవంతున్ని ప్రార్థిస్తున్నాను. అన్నయ్యకు ప్రేమ పూర్వకంగా జన్మదిన శుభాకాంక్షలు తెలియజేస్తున్నాను’’ అని పవన్ పేర్కొన్నారు.

శ్రమైక జీవనమే శ్రీ చిరంజీవి గారు విజయానికి సోపానం - JanaSena Chief @PawanKalyan#HBDMegastarChiranjeevi pic.twitter.com/2Zf18krozo

— JanaSena Party (@JanaSenaParty) August 22, 2020