టాలీవుడ్ హీరోలకు పవన్ వార్నింగ్!?
- IndiaGlitz, [Monday,December 02 2019]
జనసేన అధినేత పవన్ కల్యాణ్ టాలీవుడ్ హీరోలకు వార్నింగ్ ఇచ్చారు. రాయలసీమ పర్యటనలో బిజీబిజీగా గడుపుతున్న ఆయన.. ఓ వైపు పార్టీ కార్యకర్తలు, నేతలతో సమావేశమవుతూనే.. మరోవైపు ప్రభుత్వం వైఫల్యాలను ఎండగడుతున్నారు. అయితే ప్రభుత్వ పాఠశాలల్లో ‘ఆంగ్ల మాద్యమం’ ప్రవేశపెడుతున్నట్లు వైఎస్ జగన్ సర్కార్ కీలక ప్రకటన చేసిన సంగతి తెలిసిందే. అయితే ఈ నిర్ణయాన్ని మొదట్నుంచి పవన్ తప్పుబడుతున్నారు. తెలుగు మన మాతృభాష అని.. దాన్ని బతికించుకోవాల్సిన బాధ్యత అందరిపైనా ఉందని పవన్ ఉద్యమించారు.
సంచలన వ్యాఖ్యలవి..
అయితే ఇప్పటి వరకూ ప్రభుత్వంపై ఈ విషయంలో విమర్శలు గుప్పించిన పవన్ కల్యాణ్.. ఈసారి టాలీవుడ్‌పై పడ్డారు. హీరోల గురించి ప్రస్తావించిన ఆయన.. సినిమా సాహిత్యం రోజురోజుకు దిగజారిపోతోందని తెలుగు హీరోలకు తెలుగు రాయటం, మాట్లాడటం రాదని ఆయన వ్యాఖ్యానించారు. నిజంగానే టాలీవుడ్‌లో మహేష్ బాబు సహా మరికొందరు హీరోలకు తెలుగు చదవడం రాయడం రాదని.. కానీ వాళ్లు అవేం తెలియకుండా చక్కగా తమ పని తాము చేసుకుంటున్నారని వ్యాఖ్యానించారు. అయినా తెలుగు సినిమాలతో వచ్చే డబ్బులు వారికి కావాలని అని ఒకింత విమర్శించినట్లుగా ఆయన మాట్లాడారు. ఇండస్ట్రీలో తెలుగు దిగజారిపోతోందని.. దాన్ని బతికించాల్సిన బాధ్యత దర్శక నిర్మాతలతో పాటు నటులపై కూడా ఉందని గుర్తించుకోవాలని.. వార్నింగ్ ఇచ్చినట్లుగా పవన్ చెప్పుకొచ్చారు.
రియాక్షన్ ఉంటుందా..!
అయితే పవన్ వ్యాఖ్యలపై టాలీవుడ్ పెద్దలు కొందరు తీవ్ర ఆగ్రహం వ్యక్తం చేస్తున్నారు. మరోవైపు ఈ వ్యాఖ్యలు ఇండస్ట్రీలో చర్చనీయాంశమయ్యాయి. కాగా జగన్ నిర్ణయాన్ని ఇప్పటికే టాలీవుడ్‌కు చెందిన సీనియర్ హీరో రాజశేఖర్ స్పందించి.. మద్దతిచ్చిన విషయం విదితమే. పవన్ వ్యాఖ్యలపై రాజశేఖర్ సహా మిగిలిన హీరోలు, దర్శకనిర్మాతలు ఎలా రియాక్ట్ అవుతారనే దానిపై సర్వత్రా ఆసక్తి నెలకొంది.