పవర్ స్టార్ పవన్ కల్యాణ్ మొట్టమొదటి సారి తన వ్రాంగ్లర్ అన్‌లిమిటెడ్ రూబికాన్ జీపులో కనిపించారు. ఆ జీపు ధర 80 లక్షలు రూపాయలు కావడం విశేషం. ప్రస్తుతం పవన్ ‘వకీల్ సాబ్’ సినిమా షూటింగ్‌లో పాల్గొంటున్న విషయం తెలిసిందే. దీనిలో భాగంగా హైదరాబాద్ మెట్రో ట్రైన్ స్టేషన్ వద్ద షూటింగ్ నిర్వహిస్తున్నారు. ఈ షూటింగ్‌లో భాగంగా పవన్ తన రెడ్ కలర్ వ్రాంగ్లర్ జీపులో కనిపించి సందడి చేశారు.

‘వకీల్ సాబ్’ షూటింగ్ కోసం ఇటీవల మెట్రోలో ప్రయాణించడం ఆసక్తికరంగా మారింది. మెట్రో సిబ్బంది సహా ప్రయాణికులంతా ఒక్కసారిగా మెట్రో స్టేషన్‌లో పవన్‌ను చూసి షాక్ అయ్యారు. పవన్ అందరినీ విష్ చేస్తూ వెళ్లి మెట్రో ట్రైన్ ఎక్కారు. ట్రైన్‌లో పలువురు ప్రయాణికులతో ముచ్చటించారు. మెట్రో నుంచి హైదరాబాద్ అందాలను పరిశీలిస్తూ ఖుషీ అయ్యారు. పవన్‌తో పాటు దిల్ రాజు కూడా మెట్రోలో ప్రయాణించారు. ఈ క్రమంలోనే మెట్రోలో పవన్ ప్రయాణించిన దృశ్యాలు సోషల్ మీడియాలో వైరల్ అయ్యాయి.

కాగా.. కరోనా కారణంగా భద్రతా ప్రమాణాలను పాటిస్తూ ‘వకీల్ సాబ్’ షూటింగ్‌ను చిత్రబృందం నిర్వహిస్తోంది. ఈ సినిమా షూటింగ్‌లో పాల్గొనడానికి ముందు వరకూ గుబురు గడ్డంతో కనిపించిన పవన్.. ప్రస్తుతం మాత్రం హెయిర్ స్టైల్ మార్చేసి.. గుబురు గడ్డాన్ని తొలగించి స్మార్ట్ లుక్‌లో కనిపిస్తున్నారు. పవన్ లుక్ చూసి అభిమానులు బాగా ఖుషీ అవుతున్నారు.