ఈ సంవ‌త్స‌రం ప‌వ‌ర్ స్టార్ ప‌వ‌న్ క‌ళ్యాణ్‌, సూప‌ర్ స్టార్ మ‌హేష్‌బాబుకి వెరీ స్పెష‌ల్ కానుంది. ఎందుకంటే.. ఈ ఇద్ద‌రు అగ్ర క‌థానాయ‌కులు న‌టించిన 25వ చిత్రాలు ఈ సంవ‌త్స‌ర‌మే తెర‌పైకి రానున్నాయి. 1996లో అక్క‌డ అమ్మాయి ఇక్క‌డ అబ్బాయితో క‌థానాయకుడిగా ఎంట్రీ ఇచ్చిన ప‌వ‌న్ క‌ల్యాణ్.. ఈ సంవ‌త్స‌రం అజ్ఞాత‌వాసితో 25 చిత్రాల మైలురాయికి చేరుకుంటున్నారు. ఈ సినిమా జ‌న‌వ‌రి 10న ప్రేక్ష‌కుల ముందుకు రానుంది.

ఇక మ‌హేష్‌బాబు విష‌యానికి వ‌స్తే.. 1999లో విడుద‌లైన రాజ‌కుమారుడు చిత్రంతో క‌థానాయ‌కుడిగా తొలి అడుగు వేశారు. ప్ర‌స్తుతం చిత్రీక‌ర‌ణ ద‌శలో ఉన్న భ‌ర‌త్ అనే నేను.. మ‌హేష్ క‌థానాయ‌కుడిగా న‌టిస్తున్న 24వ చిత్రం. ఇది ఏప్రిల్ 27న విడుద‌ల కానుంది. దీని త‌రువాత వంశీ పైడిప‌ల్లి ద‌ర్శ‌క‌త్వంలో త‌న 25వ చిత్రం చేయ‌నున్నారు మ‌హేష్‌. ఫిబ్ర‌వ‌రిలో సెట్స్ పైకి వెళ్లే ఈ సినిమా.. దీపావ‌ళి కానుక‌గా ప్రేక్ష‌కుల ముందుకు రానుంద‌ని స‌మాచార‌మ్‌. అంటే.. సంక్రాంతికి ప‌వ‌న్ 25వ చిత్రం రిలీజ్ కానుంటే.. దీపావ‌ళికి మ‌హేష్ 25వ చిత్రం విడుదల కానుంద‌న్న‌మాట‌.