గాజువాకలో పవన్ నామినేషన్ దాఖలు
- IndiaGlitz, [Thursday,March 21 2019]
విశాఖ‌ప‌ట్నం జిల్లా గాజువాక శాస‌న‌స‌భ నియోజ‌క‌వ‌ర్గం నుంచి జనసేన అధినేత ప‌వ‌న్‌క‌ళ్యాణ్ నామినేషన్ దాఖలు చేశారు. గురువారం మ‌ధ్యాహ్నం 12 గంట‌ల సమయంలో రిట‌ర్నింగ్ అధికారికి నామినేషన్ ప‌త్రాల‌ను స‌మ‌ర్పించారు. న‌ట‌న‌లో ఓన‌మాలు దిద్దిన విశాఖ‌ప‌ట్నం ప్రాంతం నుంచే ఎన్నికల బరిలో పవన్ మొద‌టి అడుగేశారు. పవన్ నామినేషన్ దాఖలు చేసేటప్పుడు పార్టీ ప్రముఖులు మాజీ జేడీ ల‌క్ష్మీనారాయ‌ణ, రామ్మోహ‌న్‌రావు, మాదాసు గంగాధరం, శాంతిప్రసాద్ ఉన్నారు. ఇదిలా ఉంటే.. నామినేష‌న్‌కు ముందు డ‌ప్పు చ‌ప్పుళ్లు, బాణాసంచా పేలుళ్లతో జనసేన శ్రేణులు మ‌ర్రిపాలెం నుంచి గాజువాక జీవీఎంసీ జోన‌ల్ కార్యాల‌యం వ‌ర‌కు రోడ్ షో నిర్వహించాయి.