మెగా డాటర్ నిహారిక వివాహం జొన్నలగడ్డ చైతన్యతో అంగరంగ వైభవంగా జరిగింది. రాజస్థాన్‌లోని ఉదయ్‌పూర్‌లో ఉదయ్ విలాస్ హోటల్ ఈ వివాహ వేడుకకు వేదికగా నిలిచింది. ఈ వివాహానికి మెగా ఫ్యామిలీ మొత్తం హాజరైంది. ముందుగా పవన్ మినహా మిగిలిన వాళ్లంతా ఉదయ్‌పూర్ చేరుకోగా.. మంగళవారం సాయంత్రం పవన్ కూడా వెళ్లారు. అక్కడ మెగా హీరోల సందడి మామూలుగా లేదు. ఈ వివాహ వేడుక, సంగీత్ తదితర వేడుకలకు సంబంధించిన పిక్స్ సోషల్ మీడియాలో వైరల్ అవుతున్నాయి.

మెగా అభిమానులకు మెగా హీరోలందరినీ సింగిల్ ఫ్రేమ్‌లో చూడటం ఐ ఫీస్ట్‌లా మారింది. ఇక నిహారిక వివాహ వేడుకను మెగాస్టార్ చిరంజీవి తన తల్లికి సెల్‌ఫోన్‌లో చూపించడం ఆసక్తికరంగా మారింది. అలాగే నిహారిక వివాహ సమయంలో పవన్ భావోద్వేగానికి లోనయ్యారు. దీనికి సంబంధించిన పిక్స్ మరింత ఆసక్తికరంగా మారాయి. ఇక మెగా బ్రదర్ నాగబాబు సైతం తన కూతురి వివాహ వేడుకను చూసి తీవ్ర భావోద్వేగానికి గురయ్యారు. ట్విట్టర్ వేదికగా అభిమానులతో తన బాధను పంచుకున్నారు.

తన కూతురి వివాహాన్ని.. ఆమె స్కూలు వెళ్లిన తొలి రోజుతో పోల్చి నాగబాబు ఆవేదనకు గురయ్యారు. ‘‘నేను మరోసారి తీవ్ర ఆవేదనకు గురయ్యాను. ఇది ఆమె స్కూలుకు వెళ్లిన మొదటి రోజులా అనిపిస్తోంది అయితే తను సాయంత్రానికి తిరిగి రాదు. నా చిన్నారి కూతురు స్కూలుకు వెళ్లేంత పెద్దదై పోయిందనే నిజం నమ్మడానికే నాకు చాలా ఏళ్లు పట్టింది. ఈసారి ఇంకెన్నాళ్లు పడుతుందో.. కాలమే నిర్ణయిస్తుంది’’ అంటూ నాగబాబు ట్వీట్ ద్వారా అభిమానులతో తన బాధను పంచుకున్నారు.