నంద్యాల ఎంపీ, ప్రముఖ పారిశ్రామికవేత్త ఎస్పీవై రెడ్డి తిరిగిరాని లోకాలకు చేరుకున్నారు. ఈ సందర్భంగా జనసేన ప్రగాఢ సంతాపం వ్యక్తం చేసింది. ఈ మేరకు పార్టీ తరఫున ఓ ప్రకటన విడుదల చేసింది. "లోక్ సభ స్థానం నుంచి జనసేన అభ్యర్థిగా పోటీలో ఉన్న ఎస్పీవై రెడ్డి మరణం చాలా బాధాకరం. వారి కుటుంబానికి నా తరఫున, జన సైనికుల తరఫున ప్రగాఢ సానుభూతి తెలియచేస్తున్నాను. రాజకీయాల్లో హుందాతనం పాటించిన నాయకుడు రెడ్డి.. విద్యావంతుడు, శాస్త్ర పరిజ్ఞానం ఉన్న ఆయన పారిశ్రామికవేత్తగా ఎన్నో విజయాలు సాధించడం, సామాజిక సేవలో నిమగ్నమైన తీరు, కరవు ప్రాంతాల్లో ప్రజలకు అందించిన చేయూత ఎన్నదగినవి.

రాజకీయాల్లోకి రాకముందే పేదల ఆకలి తీరేలా రెండు రూపాయలకే ఆహారం అందించే కేంద్రాలు నెలకొల్పిన రెడ్డి గారు మూడు దఫాలు లోక్ సభ సభ్యుడిగా నిరుపమానమైన సేవలందించారు. జనసేన పార్టీలోకి వచ్చినప్పుడు రెడ్డి అనుభవం, సేవాతత్పరత సమాజానికి ఎంతో దోహదపడుతాయని మనస్ఫూర్తిగా ఆహ్వానించాను. నంద్యాల లోక్ సభ స్థానం నుంచి పోటీకి నిలిపాం. ఎన్నికలు సమీపిస్తున్న తరుణంలోనే వారు అనారోగ్యంతో ఆసుపత్రిలో చేరారు. రెడ్డి గారు ఆత్మకు శాంతి చేకూరాలని ప్రార్థిస్తున్నాను" అని పవన్ కల్యాణ్ ఓ ప్రకటనలో తెలిపారు.