தம்பி ராமையா முக்கிய கேரக்டரில் நடித்த திரைப்படத்தின் தெலுங்கு ரீமேக்கில் தெலுங்கு சூப்பர் ஸ்டார் பவன் கல்யாண் நடிக்க இருப்பதாக கூறப்படுவது பெரும் ஆச்சரியத்தை ஏற்படுத்தி உள்ளது

தம்பி ராமையா நடிப்பில் சமுத்திரக்கனி இயக்கத்தில் கடந்த ஆண்டு வெளியான திரைப்படம் வினோதய சித்தம். இந்த படத்தில் தம்பி ராமையா கார் விபத்தில் ஒன்றில் இறந்து விடுவார். அவரை ’காலம்’ மேல் உலகத்திற்கு அழைத்துச் செல்லும்போது தனக்கான பணிகள் இன்னும் இருக்கிறது என்றும் தனக்கு இன்னும் 90 நாட்கள் கால அவகாசம் கொடுத்தால் அந்த பணிகளை முடித்துவிட்டு நானே திரும்பி வருவேன் என்றும் கெஞ்சுவார். இதனை அடுத்து ’காலம்’ கேரக்டரில் நடித்த சமுத்திரக்கனி அவருக்கு 90 நாட்கள் அவகாசம் கொடுப்பதோடு அந்த 90 நாட்களும் நானும் கூடவே இருப்பேன் என்று நிபந்தனை விதிப்பார். அந்த 90 நாட்களில் நடந்தது என்ன? தம்பி ராமையா தனது பணிகளை முடித்தாரா? மீண்டும் மேலுலகம் சென்றாரா? என்பதுதான் இந்த படத்தின் கிளைமாக்ஸ். இந்த படம் ஜீ5 தமிழ் ஓடிடியில் வெளியாகி பார்வையாளர்கள் மற்றும் பத்திரிகையாளர் மத்தியில் நல்ல வரவேற்ப்பை பெற்றது

இந்த நிலையில் இந்த படத்தின் தெலுங்கு ரீமேக்கில் தம்பி ராமையா கேரக்டரில் பிரபல தெலுங்கு நடிகரும், சிரஞ்சீவியின் தங்கை மகனுமான சாய் தரன் தேஜ் நடிக்க உள்ளதாகவும், சமுத்திரக்கனி நடித்த ’காலம்’ கேரக்டரில் பவன் கல்யாண் நடிக்கவிருப்பதாகவும் கூறப்படுகிறது. இந்த படத்தை சமுத்திரகனியே தெலுங்கிலும் இயக்கவிருப்பதாகவும், இந்த படம் குறித்த அதிகாரப்பூர்வ அறிவிப்பு விரைவில் வெளிவரும் என்றும் கூறப்படுகிறது.