ప్రముఖ రచయిత పరుచూరి వెంకటేశ్వరరావుతో దర్శకుడు జయంత్ సీ పరాన్జీ దిగిన ఓ ఫోటో ఇటీవల సోషల్ మీడియాలోనూ, తెలుగు చిత్ర పరిశ్రమలను హల్ చల్ చేసిన సంగతి తెలిసిందే. ఆ ఫోటోలో పరుచూరి బాగా బక్కచిక్కిపోయి.. గుర్తుపట్టకుండా వున్నారు. దీంతో ఆయన ఆరోగ్యంపై రకరకాల కథనాలు వైరల్ అయ్యాయి. ఈ నేపథ్యంలో వెంకటేశ్వరరావు సోదరుడు గోపాలకృష్ణ స్పందించారు.

అన్నయ్య చాలా బాగున్నారని... ఆరోగ్యంగానే ఉన్నారని ఆయన తెలిపారు. 2017లో ఆస్ట్రేలియా వెళ్లి వచ్చిన తర్వాత ఆయనకు స్వల్ప ఆరోగ్య సమస్యలున్నట్లు గుర్తించామని... దానికి తగ్గట్టుగానే ఆహార నియమాలు పాటిస్తున్నారని గోపాలకృష్ణ వెల్లడించారు. దాంతో ఆయన 10 కిలోల వరకూ బరువు తగ్గారని.. అందుకే ఆయన అలా కనిపిస్తున్నారని పరుచూరి చెప్పారు. అన్నయ్య మేథస్సు అలాగే ఉందని.. నేను ఫోన్‌ చేసినప్పుడు ఎంతో చక్కగా మాట్లాడుతున్నారని గోపాలకృష్ణ పేర్కొన్నారు.

జుట్టుకు రంగు వేయకపోయేసరికి అలా ఉన్నారని.. ఆ ఫొటో షేర్‌ చేసిన జయంత్‌ను కూడా, ఎందుకయ్యా అలాంటి ఫొటో పెట్టావు అని అడిగానని గోపాలకృష్ణ పేర్కొన్నారు. చిక్కిపోయాడు, జుట్టుకు రంగేసుకోలేదని ఇలా చాలామంది అంటున్నారని... కానీ ఒక్క వ్యక్తి మాత్రం 80 ఏళ్లు వచ్చాక ఇంకెలా ఉంటాడు? ఎందుకిలా మాట్లాడుతున్నారు? అని సరిగ్గా చెప్పాడని గోపాలకృష్ణ అన్నారు. పరుచూరి వెంకటేశ్వరరావు అంటే మాస్టర్‌ ఆఫ్‌ స్క్రీన్‌ప్లే అని.. పల్స్‌ ఆఫ్‌ ది ఆడియన్స్‌ తెలిసిన వ్యక్తి అని ప్రశంసించారు. వయసు పెరిగే కొద్దీ శరీరంలో మార్పులు రావడం సహజమని.. ఆ విషయాన్ని గ్రహించి అందరూ ధైర్యంగా ఉండాలి అని గోపాలకృష్ణ సూచించారు.