தமிழ் திரை உலகின் பிரபல நடிகர் மற்றும் இயக்குனர் பார்த்திபன், தான் இயக்கிய ’டீன்ஸ்’ என்ற திரைப்படத்தை வரும் 12ஆம் தேதி ரிலீஸ் செய்ய திட்டமிட்டுள்ள நிலையில் திடீரென அவர் கோவையில் உள்ள காவல் நிலையத்தில் புகார் அளித்திருப்பது பரபரப்பை ஏற்படுத்தி உள்ளது.

உலகநாயகன் கமல்ஹாசன் நடிப்பில், ஷங்கர் இயக்கத்தில் உருவான ’இந்தியன் 2’ திரைப்படம் ஜூலை 12ஆம் தேதி வெளியாக இருக்கும் நிலையில் அதே நாளில் தான் பார்த்திபன் தனது ’டீன்ஸ்’ படத்தை வெளியிடுகிறார் என்பதும் இந்த படத்திற்கான விளம்பர பணிகள் நடைபெற்று வருகிறது என்பதும் குறிப்பிடத்தக்கது.

இந்த நிலையில் இயக்குனர் பார்த்திபன் கோவை காவல் நிலையத்தில் ’டீன்ஸ்’ படத்திற்கு கிராபிக்ஸ் மேற்பார்வையாளராக பணிபுரிந்த சிவப்பிரசாத் என்பவர் மீது புகார் அளித்துள்ளார். அந்த புகாரில் ’டீன்ஸ்’ திரைப்படத்திற்கான கிராபிக்ஸ் பணிகளை பிப்ரவரி 10 முதல் 20ஆம் தேதிக்குள் முடிந்து தருவதாக சிவபிரசாத் தன்னிடம் கூறியதாகவும் அதற்காக அவர் 68.54 லட்சம் ரூபாய் கேட்ட நிலையில் அவர் ரூ.42 லட்சம் செலுத்தி விட்டதாகவும் ஆனாலும் குறித்த நேரத்தில் அவர் பணிகளை முடிக்கவில்லை என்றும் புகாரில் தெரிவித்துள்ளார்.

பார்த்திபனின் இந்த புகாரின் அடிப்படையில் கோவை போலீசார் சிவபிரசாத் மீது வழக்குப்பதிவு செய்து விசாரணை செய்து வருவதாக தகவல் வெளியாகியுள்ளன.