பா.ரஞ்சித்தின் அடுத்த படம் குறித்த முக்கிய தகவல்
- IndiaGlitz, [Tuesday,December 17 2019]
’அட்டகத்தி’ என்ற திரைப்படத்தின் மூலம் தமிழ் சினிமாவில் இயக்குனராக அறிமுகமான இயக்குனர் பா ரஞ்சித் அவர்கள், அதன் பின்னர் ’மெட்ராஸ்’ என்ற சூப்பர்ஹிட் படத்தை இயக்கினார். இந்த படத்தின் வெற்றி அவருக்கு கபாலி, காலா என்ற இரண்டு சூப்பர் ஸ்டார் ரஜினி படத்தை அடுத்தடுத்து இயக்கும் வாய்ப்பு கிடைத்தது. இந்த நிலையில் அவர் தற்போது ஒரு ஹிந்திப் படத்தை இயக்க இருப்பதாகவும், ஆர்யா நடிக்கும் ஒரு தமிழ் படத்தையும் இயக்க இருப்பதாகவும் கூறப்படுகிறது.
இந்த நிலையில் நீலம் புரொடக்சன்ஸ் என்ற தயாரிப்பு நிறுவனத்தை தொடங்கிய பா ரஞ்சித் அந்த நிறுவனத்தின் மூலம் ’பரியேறும் பெருமாள்’ என்ற திரைப்படத்தைத் தயாரித்தார். இந்தப்படம் மிகப்பெரிய வரவேற்பைப் பெற்றது என்பதும் இந்த படத்தின் இயக்குனர் மாரி செல்வராஜூக்கு அடுத்தடுத்து பட வாய்ப்புகள் குவிகிறது என்பதும் குறிப்பிடத்தக்கது.
’பரியேறும் பெருமாள்’ வெற்றியை அடுத்து இயக்குனர் மாரி செல்வராஜ் அடுத்ததாக தனுஷ் நடிக்கும் ’கர்ணன்’ என்ற திரைப்படத்தை இயக்க உள்ளார். இந்த படத்தின் படப்பிடிப்பு விரைவில் தொடங்கவுள்ளது. இந்த நிலையில் தனுஷ் படத்தை இயக்கி முடித்தவுடன் மீண்டும் பா ரஞ்சித் அவர்களின் நீலம் புரொடக்சன்ஸ் தயாரிப்பில் உருவாக இருக்கும் ஒரு படத்தை மாரி செல்வராஜ் இயக்க இருப்பதாக செய்திகள் வெளியாகி உள்ளது. இந்த படம் குறித்த அதிகாரப்பூர்வ அறிவிப்பு விரைவில் வெளிவரும் என தெரிகிறது.