மகனுக்கு கொரனோ தொற்று உறுதி செய்யப்பட்டதாக செய்திகள் வெளியானதும் அதனை தாங்க முடியாத பெற்றோர்கள் பூச்சி மருந்து குடித்து தற்கொலைக்கு முயன்ற சம்பவம் திருச்சியில் பெரும் பரபரப்பை ஏற்படுத்தி உள்ளது.

திருச்சி அருகே சிறுகனூர் என்ற பகுதியை சேர்ந்த 35 வயது நபர் ஒருவர் சிங்கப்பூரில் டிரைவராக பணி செய்து கொண்டிருந்தார். கடந்த சில தினங்களுக்கு முன்பு சிறப்பு விமானம் மூலம் அவர் சொந்த ஊர் திரும்பினார். வெளிநாட்டில் இருந்து திரும்பிவர்களுக்கு கொரோனா பரிசோதனை அவசியம் என்ற நிலையில் அவருக்கும் கொரோனா பரிசோதனை செய்யப்பட்டது. பரிசோதனையின் முடிவில் டிரைவருக்கு கொரோனா பாசிட்டிவ் என உறுதி செய்யப்பட்டதாக கூறிய சுகாதாரத் துறையினர் அவரை மருத்துவமனையில் சேர்த்தனர். அது மட்டுமின்றி அவருடைய பெற்றோர்களையும் சுகாதாரத்துறை அதிகாரிகள் தனிமைப்படுத்தினார்கள்.

தாங்கள் தனிமைப்படுத்தப்பட்டது கூட கவலை இல்லை என்றும் ஆனால் தங்களுடைய மகனுக்கு கொரோனா வந்துவிட்டதே என்று அந்த டிரைவரின் பெற்றோர்கள் அழுது புலம்பி கொண்டிருந்ததாகத் தெரிகிறது. இந்த நிலையில் ஒரு கட்டத்தில் மன உளைச்சலில் இருந்து அவர்கள் தற்கொலை செய்ய முடிவு செய்து வயலுக்கு அடிக்கும் பூச்சி மருந்தை எடுத்துக் குடித்துவிட்டனர். இதனால் மயங்கி விழுந்த அவர்கள் இருவரையும் அக்கம் பக்கத்தில் உள்ளவர்கள் மீட்டு திருச்சி அரசு மருத்துவமனையில் சிகிச்சைக்கு அனுமதித்தனர். அங்கு அவர்களுக்கு தீவிர சிகிச்சை நடைபெற்று வருவதாக தகவல் வெளிவந்துள்ளது.

மகனுக்கு கொரோனா தொற்று என்பதை தாங்க முடியாமல் பெற்றோர்கள் பூச்சி மருந்து குடித்து தற்கொலைக்கு முயன்ற சம்பவம் அப்பகுதியில் பெரும் பரபரப்பை ஏற்படுத்தி உள்ளது.