சென்னை உயர்நீதிமன்ற தீர்ப்பின்படி தென்னிந்திய நடிகர் சங்க தேர்தல் வரும் அக்டோபர் மாதம் 18ஆம் தேதி ஓய்வு பெற்ற நீதிபதியான பத்மனாபன் அவர்களின் கண்காணிப்பில் நடைபெறவுள்ளது. இந்நிலையில் தேர்தல் தேதி நெருங்கி வருவதால், சரத்குமார் மற்றும் விஷால் அணியினர் வேட்பாளர்களை தேர்வு செய்வதிலும், பிரச்சாரம் செய்வதிலும் தீவிரமாக ஈடுபட்டு வருகின்றனர்.

இந்நிலையில் "பாண்டவர் அணி" என கூறப்படும் விஷால் தலைமையிலான அணி, நடிகர் சங்க தேர்தலை எதிர்கொள்வது குறித்த வியூகம் அமைக்கவும், தேர்தலில் போட்டியிடும் வேட்பாளர்கள் குறித்து ஆலோசனை செய்யவும், வரும் அக்டோபர் 2ஆம் தேதி காந்தி ஜெயந்தி தினத்தில் சூப்பர் ஸ்டார் ரஜினிகாந்த் அவர்களுக்கு சொந்தமான சென்னை கோடம்பாக்கத்தில் அமைந்துள்ள ஸ்ரீராகவேந்திரா திருமண மண்டபத்தில் சிறப்பு கூட்டம் ஒன்றுக்கு ஏற்பாடு செய்துள்ளனர். மாலை 4மணிக்கு இந்த கூட்டம் நடைபெறும் என்றும் இந்த கூட்டத்தில் பாண்டவர் அணிக்கு ஆதரவு கொடுக்கும் நடிகர், நடிகைகள் கலந்து கொள்வார்கள் என்றும் கூறப்படுகிறது.

இதுகுறித்த அழைப்பிதழ் ஒன்றை பாண்டவர் அணியினர் வெளியிட்டுள்ளனர். அந்த அழைப்பிதழில் "நம் நாட்டிற்கு மாற்றத்தை கொண்டு வந்த அண்ணல் காந்தியின் பிறந்த நாளில் சங்கத்தில் மாற்றம் கொண்டு வர சுதந்திரமான ஒரு சந்திப்பு. தவறாமல் வாருங்கள்' என குறிப்பிடப்பட்டுள்ளது.