ஏ.ஆர்.ரஹ்மானிடம் பி சுசீலா கேட்ட உதவி!
- IndiaGlitz, [Tuesday,May 25 2021]
ஆஸ்கார் நாயகன் ஏஆர் ரஹ்மான் அவர்களிடம் பிரபல பின்னணி பாடகி பி சுசிலா கேட்ட உதவி குறித்த தகவல் தற்போது வெளிவந்துள்ளது.
ஆஸ்கார் நாயகன் ஏஆர் ரஹ்மான் கதை எழுதி தயாரித்து இசையமைத்த திரைப்படம் ’99 சாங்ஸ்’. இந்த படம் தற்போது ஓடிடியில் வெளியாகி உள்ளது. இது குறித்த புரமோஷன் நிகழ்ச்சி ஒன்றில் ஏஆர் ரஹ்மான் பேசியபோது ’மிகச்சிறந்த தென்னிந்திய பாடகி பி சுசிலா அவர்களிடம் பேசிக்கொண்டிருந்தேன். அப்போது ’99 சாங்ஸ்’ படம் பார்த்து விட்டீர்களா? என்று கேட்டபோது ’அப்படி என்றால் என்ன? என்று அவர் என்னிடம் திரும்பி கேட்டார். அதன் பிறகு இது நான் தயாரித்த திரைப்படம் என்றும் ஓடிடியில் பாருங்கள் என்றும் கூறினேன். பின்னர் அவர் படத்தை பார்த்துவிட்டு என்னை மீண்டும் அழைத்து, ‘படம் மிகவும் நன்றாக இருக்கிறது என்றும் என்னுடைய வாழ்க்கை வரலாறு கதையும் இதே போன்று உருவாக்கப்பட வேண்டும் என்று எனக்கு ஆசை என்றும் அதற்கு நீங்கள்தான் நீங்கள்தான் உதவ வேண்டும் என்றும் கேட்டார்.
ஏழு தலைமுறைகளாக ஆயிரக்கணக்கான பாடல்களைப் பாடிய ஆளுமையுள்ள பாடகி பி சுசிலா அவர்கள் என்னுடைய படத்தை பாராட்டி இருப்பது பெருமையான விஷயம் என்று ஏஆர் ரஹ்மான் கூறினார். இந்த நிலையில் ஏஆர் ரஹ்மான், பி சுசிலாவின் வாழ்க்கை வரலாறு படத்தின் கதையையும் எழுதி தயாரிப்பாரா? என்பதை பொறுத்திருந்து பார்ப்போம்.