ஆஸ்கர் நடிகர் வில் ஸ்மித்துக்கும் இந்தியாவிற்கும் உள்ள தொடர்பு பற்றி தெரியுமா? வைரல் தகவல்!
- IndiaGlitz, [Thursday,March 31 2022]
சமீபத்தில் நடிந்து முடிந்த 94 ஆவது ஆஸ்கர் விருது வழங்கும் விழாவில் சிறந்த நடிகருக்கான விருதைத் தட்டிச்சென்றுள்ளார் அமெரிக்க நடிகர் வில் ஸ்மித். பல்வேறு ஹாலிவுட் படங்களில் திறமையான நடிப்பை வெளிப்படுத்திய இவருக்கு உலகம் முழுக்கவே ஏராளமான ரசிகர்கள் இருக்கின்றனர். இந்நிலையில் இந்திய ரசிகர்கள் அவரை அதிகம் விரும்புவதற்கான காரணம் குறித்தும் அவருடைய இந்திய வருகை குறித்தும் பல்வேறு தகவல்கள் இணையத்தில் வைரலாகி வருகின்றன.
ஆஸ்கர் விழாவில் நடிகர் வில் ஸ்மித் தனது மனைவி ஜடா பிங்கெட்டை கிண்டல் செய்ததற்காக தொகுப்பாளர் கிறிஸ் ராக்கை மேடையில் வைத்து அறைந்துவிட்டார். இது பரபரப்பாகி இருக்கும் நிலையில் வில் ஸ்மித் செய்தது சரியா? தவறா? என்பதுபோன்ற பல்வேறு கருத்து பரிமாற்றங்கள் இணையத்தில் உலா வந்து கொண்டிருக்கின்றன. இந்நிலையில் வில் ஸ்மித்தின் இந்திய வருகை குறித்த தகவல்கள் இணையத்தில் பேசுபொருளாகி இருக்கிறது.
வில் ஸ்மித் இந்தியாவின் ஹரித்துவாருக்கு கடந்த 2018 ஆம் ஆண்டே வருகை தந்துள்ளார். அப்போது யோக குரு ஒருவரைச் சந்தித்து குண்டலியோகா பற்றி அறிந்துகொண்ட அவர் மீண்டும் தனது பக்கெட் லிஸ்ட் நிகழ்ச்சிக்காக கடந்த 2019 ஏப்ரலில் வந்திருந்தார். அப்போது மீண்டும் ஹரித்துவார் பகுதியில் நடைபெற்ற பூஜை நிகழ்ச்சியில் கலந்துகொண்ட அவர் தனது பயணம் குறித்து, இந்தியாவிற்கு பயணம் செய்து வண்ணங்கள், மனிதர்கள் மற்றும் இயற்கை அழகை அனுபவிப்பது, என்னைப் பற்றியும் எனது கலையைப் பற்றியும் உலகத்தின் உண்மைகளைப் பற்றியும் ஒரு புதிய புரிதலை எழுப்பியுள்ளது எனத் தெரிவித்து இருந்தார்.
மேலும் மும்பை பகுதியில் ஷேர் ஆட்டோ ஓட்டிக்கொண்ட உற்சாகமாக ஊர் சுற்றிப்பார்த்த அவர், நடிகர் ரன்வீர் கபூருடன் இணைந்து சில நடன அசைவுகளையும் கற்றுக்கொண்டார். அதோடு சினிமா பிரபலமான கரண் ஜோஹரையும் அவர் சந்தித்தார். முதல் முறையாக ஆஸ்கர் விருதுப்பெற்றுள்ள வில் ஸ்மித் ஏற்கனவே இந்தியாவிற்கு வருகைத் தந்திருப்பது பற்றிய இந்தத் தகவல் ரசிகர்கள் பலரை ஆச்சர்யப்படுத்தி இருக்கிறது.