வடகிழக்கு பருவமழை தீவிரம் அடைந்ததை அடுத்து கடந்த ஐந்து நாட்களாக சென்னை உள்பட தமிழகத்தின் பல பகுதிகளில் கனமழை பெய்து வருகிறது. குறிப்பாக நேற்று மாலை முதல் விடிய விடிய சென்னையில் பெய்த கனமழை காரணமாக சென்னையின் பல பகுதிகளில் வெள்ளம் சூழ்ந்துள்ளது.

தாழ்வான பகுதிகளில் உள்ள குடியிருப்புகளில் வெள்ளநீர் புகுந்ததால் பொதுமக்கள் பலர் வீட்டை விட்டு வெளியேறி உணவு, குடிநீர் போன்ற அத்தியாவசிய தேவைகள் இன்றி தவித்து வருகின்றனர்.

இந்த நிலையில் நடிகர் சங்க செயலாளரும், தயாரிப்பாளர் சங்க தலைவருமான விஷால் வெள்ளம் பாதித்த பொதுமக்களுக்கு உதவ முன்வந்துள்ளார். மழையால் பாதிக்கப்பட்டவர்கள் தனது வடபழனியில் உள்ள அலுவலகத்தில் உணவு மற்றும் குடிநீரை பெற்றுக்கொள்ளலாம் என்று அவர் தெரிவித்துள்ளார். மேலும் சென்னையில் உள்ள தன்னார்வ மீட்பு குழுவினர் களமிறங்க வேண்டிய நேரம் இது என்றும் அவர் கூறியுள்ளார்.