தமிழகத்தின் 25வது ஆளுனராக நேற்று பதவியேற்று கொண்ட பன்வாரிலால் புரோஹித் அவர்களை சற்று முன்னர் நடிகரும் தேமுதிக கட்சியின் பொதுச்செயலாளருமான விஜயகாந்த் சந்தித்தார். இந்த சந்திப்பு குறித்து விஜயகாந்த் செய்தியாளர்களிடம் கூறியதாவது:

தமிழகத்தில் நிலவும் பல்வேறு பிரச்சினைகளுக்கு தீர்வு காண, ஆளுநரை சந்தித்து கடிதம் அளித்துள்ளேன். தமிழகத்தில் நிலவும் டெங்கு, சட்டம் ஒழுங்கு பிரச்னை குறித்து ஆளுநரிடம் புகார் அளித்துள்ளேன். இந்த புகார்களுக்கு உரிய நடவடிக்கை எடுப்பதாக ஆளுநர் கூறினார். 

திரையில் ரஜினி, கமல் நடிப்பது போல் ஈபிஎஸ்- ஓபிஎஸ் சேர்ந்து நன்றாக நடிக்கின்றனர். இந்த ஆட்சிக்க்கு மெஜாரிட்டி இல்லை. எனவே இந்த ஆட்சிக்கு மெஜாரிட்டி உள்ளதா என்பதை அறிய நம்பிக்கை வாக்கெடுப்பு நடத்த உத்தரவிடக்கோரி ஆளுநரிடம் வலியுறுத்தியுள்ளேன்' என்று விஜயகாந்த் கூறினார்.

மேலும் வரும் உள்ளாட்சி தேர்தலில் எந்த கட்சியுடனும் கூட்டணி இல்லை என்று கூறிய விஜயகாந்த், சிவாஜி கணேசனின் மணிமண்டப திறப்பு விழாவில் பங்கேற்க தனக்கு அழைப்பு விடுக்கப்படவில்லை என்றும் அதனால் அந்த நிகழ்ச்சியில் தான் கலந்து கொள்ளவில்லை என்றும் கூறினார்.