கொரோனாவால் சென்னையை சேர்ந்த மேலும் ஒருவர் பலி:
- IndiaGlitz, [Sunday,April 12 2020]
தமிழகத்தில் தினமும் 50க்கும் மேற்பட்டோர் கொரோனா வைரசால் பாதிக்கப்பட்டு வருவதும் அவர்களில் ஒன்று அல்லது இரண்டு பேர் கொரோனா வைரசால் பலியாகி வருவதுமான செய்திகளை தினந்தோறும் பார்த்து வருகிறோம். குறிப்பாக நேற்று தமிழகத்தில் 58 பேர் கொரோனாவால் பாதிக்கப்பட்டனர் என்றும் ஒரே ஒருவர் மட்டும் உயிரிழந்தார் என்றும் தமிழக தலைமைச் செயலாளர் தெரிவித்திருந்தார்.
இந்த நிலையில் சற்று முன் வெளியான தகவலின்படி கொரோனா வைரசால் தமிழகத்தில் மேலும் ஒரு உயிர் பலியாகி உள்ளது. சென்னை புளியந்தோப்பு பகுதியை சேர்ந்த 45 வயது பெண் ஒருவர் சமீபத்தில் கொரோனா வைரசால் பாதிக்கப்பட்டு ஓமந்தூரார் அரசு மருத்துவமனையில் சிகிச்சை பெற்று வந்த நிலையில் தற்போது அவர் சிகிச்சை பலனின்றி பலியாகி விட்டதாக செய்திகள் வெளியாகியுள்ளது.
இதனை அடுத்து தமிழகத்தில் கொரோனாவால் உயிரிழந்தோரின் எண்ணிக்கை 11 ஆக உயர்ந்துள்ளது என்பது குறிப்பிடத்தக்கது. தமிழகத்தில் தினமும் ஓரிருவர் வைரஸுக்கு பலியாகி வருவது பெரும் அதிர்ச்சியை ஏற்படுத்தியுள்ளது என்பது குறிப்பிடத்தக்கது.