మళ్ళీ బాలయ్య తోనే..
- IndiaGlitz, [Monday,January 22 2018]
కొన్ని హిట్ కాంబినేషన్లు వెండితెరపై రిపీట్ అయితే చాలు.. సినిమా ఫలితం గురించి పెద్దగా ఆలోచించక్కర్లేదు. ఎందుకంటే ఆ ఫలితం కూడా విజయాన్నే వరిస్తుంది కాబట్టి. దానికి నిదర్శనంగా ఇటీవల విడుదలైన జై సింహా' సినిమాని చెప్పుకోవచ్చు. ఈ సినిమాలో బాలకృష్ణ, నయనతార మూడోసారి జంటగా నటించారు. సింహా' సినిమాతో వీరి కలయికకి పునాది పడినా... శ్రీరామరాజ్యం'తో మంచి గుర్తింపు వచ్చింది. ఇప్పుడు ఈ రెండు సినిమాల విజయం జై సింహా'కి కూడా ప్లస్ అయిందనే చెప్పాలి.
అలాగే...నయనతారకి తెలుగులో బాలకృష్ణ బాగా అచ్చొచ్చిన హీరో. తన కెరీర్ చరమాంకంలో ఉందనుకున్నప్పుడు శ్రీరామరాజ్యం' అందించిన విజయం న‌య‌న్‌కి బాగా ప్లస్ అయ్యింది. దాంతో నయనతార కెరీర్ యు టర్న్ తీసుకుని సెకండ్ ఇన్నింగ్స్ ప్రారంభించడానికి నాంది పలికింది. ఆ తర్వాత తమిళంలో వరుస ఆఫర్లతో లేడీ సూప‌ర్ స్టార్ అయిపోయింది న‌య‌న్‌. అయితే తెలుగులో మాత్రం శ్రీరామరాజ్యం' తర్వాత కృష్ణం వందే జగద్గురుం', గ్రీకువీరుడు', అనామిక', బాబు బంగారం' వంటి సినిమాల్లో నటించినా.. మళ్ళీ అంతటి విజయాన్ని అందుకోలేకపోయిందీ భామ. ఇక ఏడేళ్ళ తర్వాత జై సింహా' సినిమాలో బాలకృష్ణ సరసన ముచ్చ‌ట‌గా మూడోసారి నటించి తెలుగులో మళ్ళీ విజయాన్ని సొంతం చేసుకుంది ఈ మలయాళీ ముద్దుగుమ్మ.