చిన్న సినిమాగా విడుద‌లై సంచ‌ల‌న విజ‌యం సాధించిన చిత్రాల్లో 'నువ్వే కావాలి' ది ప్ర‌త్యేక స్థానం. అప్ప‌టివ‌ర‌కు బాల‌న‌టుడుగానే ప‌రిచ‌య‌మున్న‌ త‌రుణ్ ఈ సినిమాతోనే క‌థానాయ‌కుడుగా తొలి అడుగులు వేశాడు. రిచా హీరోయిన్‌గా న‌టించిన తొలి చిత్ర‌మూ ఇదే. మ‌ల‌యాళంలో విజ‌యం సాధించిన 'నిర‌మ్' (షాలిని హీరోయిన్‌)కి తెలుగు వెర్ష‌న్ అయిన ఈ సినిమాని ఉషాకిర‌ణ్ మూవీస్ నిర్మించ‌గా.. కె.విజ‌య్ భాస్క‌ర్ ద‌ర్శ‌క‌త్వం వ‌హించారు. నేటి ప్ర‌ముఖ ద‌ర్శ‌కుడు త్రివిక్ర‌మ్ శ్రీ‌నివాస్ సంభాష‌ణ‌లు అందించారు.

కోటి సంగీతంలోని పాట‌ల‌న్నీ అప్ప‌ట్లో సంచ‌ల‌నం సృష్టించాయి. 'అన‌గ‌న‌గా ఆకాశం ఉంది', 'ఎక్క‌డ ఉన్నా ప‌క్క‌న నువ్వే ఉన్న‌ట్టుంట్టుంది', 'క‌ళ్ళ‌ల్లోకి క‌ళ్లు పెట్టి చూడ‌వెందుకు' పాట‌లు ఇప్ప‌టికీ ఎక్క‌డో చోట వినిపిస్తూనే ఉంటాయి. 2000కి ఉత్త‌మ ప్రాంతీయ చిత్రంగా జాతీయ పుర‌స్కారాన్ని పొంద‌డంతో పాటు 5 ఫిల్మ్ ఫేర్ అవార్డుల‌ను సొంతం చేసుకున్న 'నువ్వే కావాలి' నేటి (అక్టోబ‌ర్ 13)తో 15 సంవ‌త్స‌రాల‌ను పూర్తిచేసుకుంటోంది.