Numaish:నుమాయిష్ ఎగ్జిబిషన్ ప్రారంభం.. అప్పటివరకు ట్రాఫిక్ ఆంక్షలు..
- IndiaGlitz, [Monday,January 01 2024]
హైదరాబాద్‌లో నుమాయిష్ ఎగ్జిబిషన్ ప్రారంభమైంది. నగరంలోని నాంపల్లి ఎగ్జిబిషన్ గ్రౌండ్‌లో సీఎం రేవంత్ రెడ్డి దీనిని ప్రారంభించారు. జనవరి 1 నుంచి ఫిబ్రవరి 15 వరకు 45 రోజుల పాటు ఈ ఎగ్జిబిషన్ జరగనుంది. 80 ఏళ్లుగా తెలంగాణలో జరుగుతున్న నుమాయిష్ ఎగ్జిబిషన్‌కు దేవ్యాప్తంగా వర్తకులు వస్తారు. ఈసారి కూడా దేశం నలుమూలల నుంచి సుమారు 2,400 స్టాల్స్ ఏర్పాటు చేయనున్నారు. రాష్ట్రంలో కాంగ్రెస్ ప్రభుత్వం రావడంతో నుమాయిష్ ప్రెసిడెంట్‌గా మంత్రి దుద్దిళ్ల శ్రీధర్ బాబు నియమితులయ్యారు. ఎగ్జిబిషన్‌లో ఎలాంటి అవాంఛనీయ ఘటనలు జరగకుండా అధికారులు అన్ని ఏర్పాట్లు చేశారు.
ఈసారి ఎగ్జిబిషన్ టికెట్ ధర రూ.40గా నిర్ణయించారు. ప్రతి రోజూ సాయంత్రం 3.30 నుంచి రాత్రి 10.30 వరకు ఎగ్జిబిషన్ గ్రౌండ్‌లోకి సందర్శకులను అనుమతిస్తారు. అయితే ఉదయం 11 గంటల నుంచి మధ్యాహ్నం 3 గంటల వరకు ఎగ్జిబిషన్ లోపల వాహనాలతో సందర్శించే ఏర్పాట్లు కూడా చేశారు. ఇందుకు ప్రత్యేక రుసుము చెల్లించాల్సి ఉంటుంది. ఎగ్జిబిషన్ నేపథ్యంలో నేటి నుంచి ఫిబ్రవరి 15వ తేదీ వరకు ప్రతి రోజు సాయంత్రం 4 గంటల నుంచి అర్ధరాత్రి వరకు నాంపల్లి పరిసరాలలో ట్రాఫిక్ ఆంక్షలు విధిస్తున్నట్లు నగర పోలీస్‌ కమిషనర్‌ శ్రీనివాస్‌రెడ్డి ఉత్తర్వులు జారీ చేశారు.
మరోవైపు టీఎస్ ఆర్టీసీ ప్రత్యేకంగా బస్సులు నడపనుంది. అలాగే మెట్రో రైళ్ల సమయాన్ని కూడా పెంచారు. మియాపూర్- ఎల్బీనగర్, నాగోల్ - రాయదుర్గం మార్గాల్లో చివరి మెట్రో రైలు రాత్రి 12.15 గంటలకు మొదలై ఒంటి గంటకు గమ్యస్థానాలకు చేరుకుంటాయి. ఇదిలా ఉంటే ఈసారి దాదాపు 22 లక్షల మంది ఎగ్జిబిషన్‌ను సందర్శిస్తారని నిర్వాహకులు అంచనా వేస్తారు. ఎగ్జిబిషన్‌కు వచ్చే సందర్శకులను గోషామహల్, అజంతా గేట్, గాంధీభవన్ గేట్ల వద్ద మెటల్ డిటెక్టర్లతో తనిఖీ చేసి లోపలికి అనుమతిస్తారు. ప్రతి సంవత్సరం మాదిరిగానే సందర్శకుల కోసం వివిధ సాంస్కృతిక కార్యక్రమాలు, క్రీడా పోటీలు నిర్వహించనున్నారు.