టాలీవుడ్ టాప్ హీరోలు మెగా పవర్ స్టార్ రామ్‌చరణ్, యంగ్ టైగర్ ఎన్టీఆర్ ప్రధాన పాత్రల్లో దర్శకధీరుడు రాజమౌళి తెరకెక్కిస్తున్న చిత్రం ‘ఆర్ఆర్ఆర్’. ఇప్పటికే ఈ చిత్రానికి సంబంధించి పలు ఆసక్తికర విషయాలను చెప్పింది చిత్రబృందం. అయితే ఈ మూవీలోని కొన్ని పాత్రల్లో ఎవరెవరు..? చేస్తున్నారన్నది మాత్రం ఇంకా తెలియరాలేదు.. దీంతో కొన్ని వెబ్‌సైట్లు ఓ రేంజ్‌ గాసిప్స్ రాసేస్తున్నాయ్. అయితే తాజాగా ఈ చిత్రంలో సముద్రఖని ప్రధాన పాత్రలో నటిస్తారని ఇదివరకే రాజమౌళి ప్రకటించిన విషయం విదితమే.

అయితే.. ఆయన పాత్ర ఏంటి..? విలన్‌గా నటిస్తారా..? లేకుంటే చెర్రీకి లేదా ఎన్టీఆర్‌కు బాబాయ్‌గా నటిస్తారా..? అనేది మాత్రం తెలియరాలేదు. తాజాగా.. ఎన్టీఆర్ బాబాయ్‌గా సముద్రఖని నటిస్తారని క్లారిటీ వచ్చేసింది.! బ్రిటిష్ వారిపై తిరుగుబాటును ప్రారంభించే వ్యక్తిగా ఆయన పాత్ర ఉంటుందట. కాగా.. ఇప్పటికే చెర్రీ సరసన అలియాభట్ నటిస్తుండగా.. ఎన్టీఆర్‌కు ఇంకా కథానాయిక ఇంకా దొరకలేదు. సుమారు 350 నుండి 400 కోట్ల బడ్జెట్ కేటాయించి దానయ్య ఈ చిత్రాన్ని నిర్మిస్తున్న విషయం విదితమే.