రాజ‌మౌళి ద‌ర్శ‌క‌త్వంలో రూపొందుతోన్న ‘ఆర్ఆర్ఆర్‌(రౌద్రం ర‌ణం రుధిరం)’ చిత్రీకరణలో యంగ్ టైగ‌ర్ ఎన్టీఆర్ బిజీగాఉన్న సంగ‌తి తెలిసిందే. దీని త‌ర్వాత త్రివిక్ర‌మ్ ద‌ర్శ‌క‌త్వంలో సినిమా చేయ‌నున్నాడు తార‌క్‌. అయితే ఈ గ్యాప్‌లో మ‌రోసారి బుల్లితెర‌పై సంద‌డి చేయ‌నున్నాడ‌నే వార్త‌లు సోష‌ల్ మీడియాలో చ‌క్క‌ర్లు కొడుతున్న సంగ‌తి తెలిసిందే. జెమినీ టీవీలో మీలో ఎవ‌రు కోటీశ్వ‌రుడు త‌రహా ప్రోగ్రామ్‌లో తార‌క్ పాల్గొన‌బోతున్నాడ‌ని టాక్ వినిపిస్తోంది. కాగా.. లేటెస్ట్ స‌మాచారం కోసం ఈ ప్రోగ్రామ్‌లో ఎపిసోడ్‌కు ముప్పై ల‌క్ష‌ల చొప్పున ఎన్టీఆర్ రెమ్యున‌రేష‌న్ అడిగాడ‌ట‌. ఆ లెక్క‌లో అర‌వై ఎపిసోడ్స్ ఉన్న ఈ ప్రోగ్రామ్‌కు దాదాపు ప‌ద్దెనిమిది కోట్ల రూపాయ‌ల రెమ్యున‌రేష‌న్స్ అవుతుంది. తెలుగు రియాలిటీ షోలో ఇంత భారీ రెమ్యునరేషన్ తీసుకోవడం హాట్ టాపిక్‌గా మారింది.

బుల్లితెరపై ఎన్టీఆర్ సందడి చేయడం కొత్తేమీ కాదు. తెలుగు రియాలిటీ షో బిగ్‌బాస్ తొలి సీజన్‌కు తారక్ వ్యాఖ్యాతగా వ్యవహరించారు. బిగ్‌బాస్ షో సక్సెస్ కావడానికి ఎన్టీఆర్ హోస్ట్ ఎంతగానో ఉపయోగపడింది. కానీ తర్వాత బిగ్‌బాస్ షో వ్యాఖ్యాతగా నెక్ట్స్ సీజన్స్‌కు పనిచేయలేదు. కానీ ఇప్పుడు మరోసారి వెండితెరతో పాటు బుల్లితెరపై సందడి చేయడానికి ఎన్టీఆర్ సిద్ధమవుతున్నారు. మరి ఈ షో ఎప్పటి నుండి ఉంటుందో, ఏమో అనే సంగతి తెలియాలంటే మాత్రం కొన్నాళ్లు ఆగక తప్పదు.