మెగాపవర్ స్టార్ రామ్‌చరణ్, యంగ్ టైగర్ ఎన్టీఆర్ ప్రధాన పాత్రల్లో దర్శకధీరుడు రాజమౌళి తెరకెక్కిస్తున్న చిత్రం ‘ఆర్ఆర్ఆర్’. కొన్ని ఇప్పటికే ఈ సినిమాలో చెర్రీ, జూనియర్ ఇద్దరి పాత్రలను జక్కన్న మీడియా సమావేశం నిర్వహించి వివరించిన సంగతి తెలిసిందే. కొద్ది రోజుల క్రితమే సినిమా షూటింగ్ ప్రారంభమవ్వగా చరణ్‌కు గాయాలవ్వడంతో బ్రేకిలిచ్చి ఎన్టీఆర్‌తో షూటింగ్ చేస్తున్నారు. అయితే ఆ మధ్య జూనియర్‌కు కూడా గాయాలైనట్లు వార్తలు వచ్చాయి. అయితే ప్రస్తుతానికి ఆర్ఆర్ఆర్ షూటింగ్ నిలిచిపోయినట్లు తెలుస్తోంది.

ఎన్టీఆర్‌కు జోడి దొరికింది..!

ఇదిలా ఉంటే.. చెర్రీ సరసన జోడియా అలీయాభట్‌ను తీసుకున్న చిత్రబృందం.. ఎన్టీఆర్ సరసన ఎవరనే విషయం ఇంకా తెలియరాలేదు.. హీరోయిన్ వేటలో నిర్మాత, డైరెక్టర్ ఉన్నారు. ఈ నేపథ్యంలో ఈ సినిమా కోసం బ్యూటీ నిత్యామీనన్‌ను తీసుకున్నారనే టాక్ బలంగా నడుస్తోంది. అయితే ఆమె సినిమాలో ఏ పాత్రలో నటిస్తోందా..? అనే విషయం సర్వత్రా ఆసక్తిగా మారింది. ఎన్టీఆర్ పాత్రను ప్రేమించే గిరిజన యువతిగా నిత్య కనిపిస్తుందని సమాచారం. ఇప్పటికే ఎన్టీఆర్ సరసన నిత్యా నటించి మెప్పించిన సంగతి తెలిసిందే.

దీంతో నిత్య అయితే సరిగ్గా సూట్ అవుతుందని చిత్రబృందం భావించిందట. ఇదిలా ఉంటే.. ఇప్పటికే నిత్యామీనన్‌ను చిత్రబృందం సంప్రదించగా ఆమె గ్రీన్ సిగ్నల్ ఇచ్చిందని ఫిల్మ్ నగర్‌లో పుకార్లు షికార్లు చేస్తున్నాయి. సో ఇదే నిజమైతే నిత్యా భారీ బడ్జెట్‌తో తెరకెక్కుతున్న సినిమాలో నటించే అదృష్టం దక్కినట్లే. అయితే ఇందులో ఏ మాత్రం నిజముంది..? అసలు ఇది వాస్తవమా కాదా..? అనేది తెలియాలంటే చిత్రబృందం స్పందించే దాకా వేచి చూడాల్సిందే మరి.