தயாரிப்பாளர் சங்க அலுவலகத்துக்கு பூட்டு போட்ட விவகாரம்: விஷாலின் அதிரடி நடவடிக்கை
- IndiaGlitz, [Thursday,January 03 2019]
தமிழ் திரைப்பட தயாரிப்பாளர் சங்க அலுவலகத்திற்கு சமீபத்தில் ஒருசிலர் பூட்டு போட்ட விவகாரம் குறித்து தயாரிப்பாளர்கள் ஏ.எல்.அழகப்பன் உள்பட 29 பேருக்கு விளக்கம் கேட்டு தயாரிப்பாளர் சங்கம் நோட்டீஸ் அனுப்பி உள்ளது.
தயாரிப்பாளர் சங்க தலைவர் விஷால் மீது அதிருப்தி தெரிவித்து டிசம்பர் 19ஆம் தேதி அதிருப்தியாளர்கள் சிலர் சென்னை தியாகராய நகரில் உள்ள தயாரிப்பாளர் சங்கத்துக்கு பூட்டுப் போட்டனர். பூட்டு போட்டவர்கள் மீது எந்தவித நடவடிக்கையும் எடுக்காத போலீசார் பூட்டை அகற்ற முயன்ற தயாரிப்பாளர் சங்க தலைவர் விஷாலை கைது செய்தது. இதனையடுத்து நீதிமன்ற உத்தரவின்படி தயாரிப்பாளர் சங்கத்தின் பூட்டு உடைக்கப்பட்டது.
இந்த நிலையில் தயாரிப்பாளர் சங்க அலுவலகத்துக்கு பூட்டு போட்டது குறித்து சம்மந்தப்பட்டவர்களுக்கு விளக்கம் கேட்டு நோட்டீஸ் அனுப்ப ஏற்கனவே முடிவு செய்யப்பட்ட நிலையில் நேற்றிரவு 29 பேருக்கு தமிழ் திரைப்படத் தயாரிப்பாளர் சங்கம் நோட்டீஸ் அனுப்பியுள்ளது.
இந்த நோட்டீசுக்கு 15 நாட்களில் சம்மந்தப்பட்டவர்கள் பதில் தெரிவிக்க வேண்டும் என்றும், பதில் வராத நிலையில் அடுத்தக்கட்ட நடவடிக்கை எடுக்கப்படும் என்றும் தயாரிப்பாளர் சங்கம் அறிவித்துள்ளது.