'నోటా' అనే పేరు వినగానే గ‌తేడాది విజ‌య్ దేవ‌ర‌కొండ న‌టించిన బై లింగ్వుల్ చిత్రం అని అంద‌రికీ ఇట్టే అర్థ‌మ‌వుతుంది. ఈ సినిమాను సూర్య క‌జిన్ జ్ఞాన‌వేల్ రాజా నిర్మించారు. ఈ సినిమా క‌థ వ‌ల్ల సూర్య సినిమా బాగా లేట‌యింది. అదెలాగా? అని ఆరా తీస్తే సూర్య ప్ర‌స్తుతం న‌టిస్తున్న 'ఎన్‌జికే' క‌థ‌, `నోటా` క‌థ ఒకే ర‌కంగా ఉన్నాయ‌ట‌. సూర్య క‌జిన్ నిర్మిస్తుండ‌టంతో క‌థ తెలిసింద‌ట‌.

పైగా 'నోటా' గ‌తేడాది విడుద‌లైంది. సూర్య ఎన్.జి.కె కూడా గతేడాదే విడుద‌ల కావాల్సింది. కాక‌పోతే ముందు 'నోటా' విడుద‌ల కావ‌డం, స‌రిగా ఆడ‌క‌పోవ‌డంతో ఎన్‌.జి.కె. క‌థ‌ను మార్చాల్సి వ‌చ్చింద‌ట‌. ఈ విష‌యాన్న ఆ చిత్ర నిర్మాత చెప్పిన‌ట్టు తెలిసింది. అయితే ఆయ‌న ఎక్క‌డా 'నోటా' అనే పేరును మాత్రం ప్ర‌స్తావించ‌లేదు.

ఇక్క‌డ గ‌మ‌నించాల్సిన విష‌యం ఏంటంటే నిన్న‌టిదాకా త‌మిళ హీరోల చిత్రాల వ‌ల్ల తెలుగు సినిమాల‌కు ఏర్ప‌డిన ప‌లు ఇబ్బందుల గురించి విన్నాం. అయితే విజ‌య్ దేవ‌ర‌కొండ త‌మిళ ఎంట్రీనే ఓ పెద్ద స్టార్ హీరో సినిమాకు త‌ల‌నొప్పిగా మార‌డం త‌మిళ తంబిల‌కు పెద్ద‌గా మింగుడుప‌డ‌లేద‌ని గుస‌గుస‌లు వినిపిస్తున్నాయి. ఎన్.జి.కె.లో సాయి ప‌ల్ల‌వి, ర‌కుల్ ప్రీత్‌సింగ్ క‌లిసి సూర్య ప‌క్క‌న క‌నిపిస్తారు. మే 31న ఈ సినిమా విడుద‌ల కానుంది.