సమంత అస్స‌లు త‌గ్గ‌డం లేదు
- IndiaGlitz, [Thursday,May 17 2018]
చెన్నై బ్యూటీ, అక్కినేని వారి కోడలు సమంత ఓ విష‌యంలో తన తోటి హీరోయిన్ల కంటే మేటిగా ఉంద‌నే చెప్పాలి. అదేమిటంటే.. ఇప్పటికే ఏ ద‌క్షిణాది కథానాయికకి సాధ్యం కాని విధంగా ఓవర్సీస్‌లో మిలియన్ డాలర్ క్లబ్‌లో టాప్ ప్లేస్‌లో కొనసాగుతోంది. తాజాగా సావిత్రి బయోపిక్‌గా తెరకెక్కిన ‘మహానటి’ కూడా విజయం సాధించడంతో.. సమంత మరో మిలియన్ డాలర్ క్లబ్ సినిమాను తన ఖాతాలో వేసుకుంది.
ఈ సినిమాలో మధురవాణిగా సహాయక పాత్ర పోషించిన సామ్.. మరోసారి వన్ మిలియన్ మార్కును అందుకోవడం విశేషం. ఒక్కసారి మిలియన్ డాలర్ క్లబ్ వైపు సాగిన ఈమె ప్రయాణాన్ని గమనిస్తే.. ‘దూకుడు’తో తొలిసారి ఈ క్లబ్‌లో అడుగుపెట్టిన సమంత..
ఆ తర్వాత ‘ఈగ’, ‘సీతమ్మ వాకిట్లో సిరిమల్లె చెట్టు’, ‘అత్తారింటికి దారేది’, ‘మనం’, ‘సన్ ఆఫ్ సత్యమూర్తి’, ‘బ్రహ్మోత్సవం’, ‘అ ఆ’, ‘జనతా గ్యారేజ్’, ‘24’, ‘తెరి’, ‘మెర్సల్’, ‘రంగస్థలం’తో 13 సినిమాలతో తొలి స్థానంలో ఉన్న ఈమె.. తాజాగా విడుదలైన ‘మహానటి’తో కలుపుకుని 14 సినిమాలతో మిలియన్ డాలర్ క్వీన్‌గా తన హ‌వాను కొనసాగిస్తోంది. వీటిలో ‘రంగస్థలం’, ‘అఆ’, ‘మహానటి’ చిత్రాలు 2 మిలియన్ డాలర్ల‌కు పైగా వసూళ్లను రాబట్టడం విశేషం.