Chandrababu Naidu: చంద్రబాబును ఆసుపత్రికి తరలించాల్సిన అవసరం లేదు: వైద్యులు
- IndiaGlitz, [Saturday,October 14 2023]
జైల్లో చంద్రబాబు ఆరోగ్యంగానే ఉన్నారని వైద్యులు తెలిపారు. రాజమండ్రి జైలులో ఏర్పాటు చేసిన మీడియా సమావేశంలో జైలు అధికారులతో కలిసి వైద్యులు పాల్గొన్నారు. ఈ సందర్భంగా డాక్టర్ శివకుమార్ మాట్లాడుతూ ఆయన శరీరంపై దద్దుర్లు ఉన్నాయని.. ప్రస్తుతం 67 కేజీల బరువు ఉన్నారని పేర్కొన్నారు. చంద్రబాబును చల్లని వాతావరణంలో ఉంచాలని ఉన్నతాధికారులకు సూచిస్తామన్నారు. ప్రస్తుతానికి ఆయనను ఆసుపత్రికి తరలించాల్సిన అవసరం లేదన్నారు. ప్రస్తుత వాతావరణ పరిస్థితుల్లో ఎవరికైనా డీహైడ్రేషన్ వచ్చే అవకాశం ఉందని.. చంద్రబాబు వ్యక్తిగత వైద్యులను సంప్రదించిన తర్వాతే ఆయనకు ట్రీట్మెంట్ ఇచ్చామని వెల్లడించారు. ఆయన యాక్టివ్‌గా ఉన్నారని తమతో మామూలుగానే మాట్లాడారని చెప్పారు. జైలుకు రాకముందు ఆయన ఆరోగ్య పరిస్థితి రికార్డ్స్ ఏంటో తమకు తెలియదని వివరించారు.
వైద్యుల నివేదికను కోర్టులో సమర్పిస్తాం..
వైద్యులు ఇచ్చిన నివేదికను కోర్టు దృష్టికి తీసుకువెళతామని జైళ్ల శాఖ డీఐజీ రవికిరణ్‌ తెలిపారు. చంద్రబాబు హైప్రొఫైల్ ప్రిజనరీ అని ఆయనను చాలా జాగ్రత్తగా చూసుకుంటున్నామని చెప్పారు. 24 గంటలు అధికారులు ఆయన ఆరోగ్యం పర్యవేక్షిస్తున్నారని స్పష్టం చేశారు. చంద్రబాబు వ్యక్తిగత వైద్యులతో డాక్టర్ల బృందం మాట్లాడారని.. ఆయన వ్యక్తిగత వైద్యులు సూచిస్తే అవసరమైన వైద్య పరీక్షలు చేస్తామన్నారు. ఇంటి వద్ద ఉండే వాతావరణానికి జైలులో వాతావరణం భిన్నంగా ఉంటుందని డీఐజీ వెల్లడించారు.
చంద్రబాబు ఆరోగ్యంపై కుటుంబసభ్యుల ఆందోళన..
అంతకుముందు రాజమండ్రి సెంట్రల్ జైలులో ఉన్న చంద్రబాబుతో ఆయన కుటుంబసభ్యులు నారా లోకేష్, భువనేశ్వరి, తెలంగాణ టీడీపీ రాష్ట్ర అధ్యక్షుడు కాసాని జ్ఞానేశ్వర్ ములాఖత్ అయ్యారు. జైలులో బాబును చూసి భువనేశ్వరి, లోకేష్ తీవ్ర భావోద్వేగానికి గురైనట్లు తెలుస్తోంది. ములాఖత్ అనంతరం మీడియాతో మాట్లాడకుండానే లోకేష్, భువనేశ్వరి అక్కడి నుంచి వెళ్లిపోయారు. ఎప్పుడు ములాఖత్ అయిన మీడియాతో మాట్లాడే లోకేష్.. ఈసారి మాత్రం మాట్లాడకుండా వెళ్లారు. మానసికంగా చంద్రబాబు స్ట్రాంగ్‌గా ఉన్నా.. ఆరోగ్య సమస్యలపై కుటుంబ సభ్యులు ఆందోళన చెందుతున్నారు.