ఇప్పుడు టాలీవుడ్‌లో బ‌యోపిక్‌ల హ‌వా న‌డుస్తున్న సంగ‌తి తెలిసిందే. 'మ‌హాన‌టి' హిట్ అయిన‌ప్ప‌టి నుంచీ బ‌యోపిక్‌ల హ‌వా జోరుగా కొన‌సాగుతోంది. ఈ మ‌ధ్య‌నే య‌న్‌.టి.ఆర్ బ‌యోపిక్‌ను క‌థానాయ‌కుడు, మ‌హానాయ‌కుడు అని రెండు విభాగాలుగా విడుద‌ల చేయ‌నున్న‌ట్టు ప్ర‌క‌టించిన విష‌యం తెలిసిందే.

సినిమాల‌ను, రాజ‌కీయాల‌ను క‌లిపి తెర‌కెక్కిస్తే రెండిటికీ న్యాయం చేయ‌లేమ‌నే థాట్ వచ్చి ఇలా రెండు విభాగాలు చేశార‌ట‌. తాజాగా ఏమైందో.. వై.య‌స్‌. కాంపౌండ్‌లోనూ ఇలాంటి నిర్ణ‌యానికే వ‌చ్చారు. వై.య‌స్‌. జీవితానికి సంబంధించిన అంశాల‌ను చెప్పే బ‌యోపిక్ 'యాత్ర‌'లో ఆయ‌న త‌న‌యుడు జ‌గ‌న్ పాత్ర ఉండాల్సిన అవ‌స‌రం ఏంట‌ని ఆలోచిస్తున్నారు.

ఈ సినిమాలో ఎక్కువ‌గా వై.య‌స్‌.రాజ‌శేఖ‌ర‌రెడ్డి పాద‌యాత్ర‌, ఆయ‌న జీవితం, రాజ‌కీయ‌నాయకుడిగా, ప్ర‌జానేత‌గా ఆయ‌న ఎదుగుద‌ల ఉంటాయి. ఈ సినిమా గురించి ప్ర‌క‌ట‌న రాగానే చాలా మందికి రాజ‌శేఖ‌ర‌రెడ్డి పాత్రేను ఎవ‌రుచేస్తార‌నే విష‌యం క‌న్నా, జ‌గ‌న్ పాత్ర‌కు ఎవ‌రు స‌రిపోతార‌నే ఆలోచ‌న‌లే వ‌చ్చాయి. సూర్య‌, కార్తి పేర్లు ప్ర‌ముఖంగా వినిపించాయి.

అయితే ఇప్పుడు వారిద్ద‌రిలో ఎవ‌రు ఈ సినిమాలో న‌టించినా, ప్ర‌జ‌ల ఫోక‌స్ మ‌మ్ముట్టి నుంచి ప‌క్క‌కు తొల‌గే అవ‌కాశం ఉంద‌ని, ఈ సినిమా కేవ‌లం రాజ‌శేఖ‌ర‌రెడ్డి జీవితాన్ని సెల‌బ్రేట్ చేసే చిత్రం కాబ‌ట్టి ఈ సినిమాను కేవ‌లం మ‌మ్ముట్టి పాత్ర‌కే ప‌రిమితం చేయ‌ద‌ల‌చుకున్నారని స‌న్నిహిత వ‌ర్గాల స‌మాచారం. కృష్ణ కుమార్ సంగీతం, స‌త్య‌న్ సూర్య‌న్ కెమెరామెన్‌గా వ‌ర్క్ చేస్తున్నారు. డిసెంబ‌ర్ 21న సినిమా విడుద‌ల కానుంది.