உலக நாயகன் கமல்ஹாசன் விரைவில் அரசியல் கட்சி ஆரம்பித்து அரசியலில் குதிப்பார் என்று எதிர்பார்க்கப்படும் நிலையில் நேற்று டெல்லியில் நடந்த ஒரு நிகழ்ச்சியில் அவர் கலந்து கொண்டு விரைவில் கட்சியின் பெயரை அறிவிப்பேன் என்று தெரிவித்துள்ளார்.

வெகுவிரைவில் கட்சியின் பெயர் மற்றும் கொள்கையை அறிவிப்பேன் என்று கூறிய கமல், அரசியலில் எந்த கட்சியும் தீண்டத்தகாத கட்சி இல்லை என்றும், தமிழக மக்களின் நலனுக்காக ஒருசில கட்சிகளுடன் கூட்டணி வைக்கவும் தயக்கம் இல்லை என்று கூறியுள்ளார்.

ஆனால் அதே நேரத்தில் சித்தாந்தங்களின் அடிப்படையின் பாஜக மற்றும் காங்கிரஸ் ஆகிய இரண்டு கட்சிகளுடன் கூட்டணி அமைக்க மாட்டேன் என்று கூறிய கமல், மாற்றத்தை விரும்புகிறவர்கள் நிச்சயம் தன்னை ஆதரிப்பார்கள் என்றும் கூறினார்.

கட்சி ஆரம்பித்து அரசியலுக்கு வர தனக்கு தைரியம் இருப்பதாகவும், தமிழக அரசியலில் தன்னை முன்னிறுத்தாமல், மாற்றத்தை மட்டுமே முன்னிறுத்த போவதாகவும் அவர் மேலும் தெரிவித்தார்.