ఒకే ఒక్క ఛాన్స్... ఒక్క ఛాన్స్ అంటూ ముద్దుగా బొద్దుగా సంగీత `ఖ‌డ్గం`లో అడిగిన తీరును ఇంకా తెలుగువారు మ‌ర్చిపోలేక‌పోతున్నారు. ఇప్పుడు స‌రిగ్గా అదే ప‌రిస్థితిలో ఉన్నారు అఖిల్‌. అయితే ఆయ‌న అడుగుతున్న‌ది ఒక్క ఛాన్స్ గురించి కాదు. ఒక్క హిట్ గురించి. ఒకే ఒక్క హిట్‌... బోణీ హిట్ దొరికితే చాల‌ని తాప‌త్ర‌య‌ప‌డుతున్నారు.

`అఖిల్‌`తో హీరోగా ఎంట్రీ ఇచ్చిన అఖిల్‌కి ఆ సినిమా పెద్ద‌గా హిల్ కాలేదు. ఆ త‌ర్వాత హ‌లో కూడా ఆశించిన రిజ‌ల్ట్ ఇవ్వ‌లేక‌పోయింది. త‌న తండ్రి ` మ‌జ్ను`గా న‌టిస్తే, అఖిల్ అదే పేరుతో హిట్ కొట్టొచ్చ‌ని భావించి `మిస్ట‌ర్ మ‌జ్ను`గా కూడా ట్రై చేశాడు. కానీ ప్రేక్ష‌కులు పెద‌వి విరిచారు. మూడు ఫ్లాపులు పోతేపోయాయ‌నుకుని ఆయ‌న ప్ర‌స్తుతం బొమ్మ‌రిల్లు భాస్క‌ర్‌తో ఓ సినిమా చేస్తున్నారు. గోల్డెన్ లేడీగా దూసుకుపోతున్న పూజా హెగ్డే అందులో నాయిక‌. ఆ త‌ర్వాత అఖిల్ మ‌రో సినిమా చేస్తున్నారు. ఈ సినిమాకు ప్ర‌శాంత్ వ‌ర్మ ద‌ర్శ‌కుడు. `అ`, `క‌ల్కి` చిత్రాల‌కు ద‌ర్శ‌క‌త్వం వ‌హించింది ప్ర‌శాంత్ వ‌ర్మే. స్క్రీన్‌ప్లే ప్ర‌ధానంగా వెరైటీ సినిమాల‌ను తీస్తాడ‌ని ప్ర‌శాంత్ వ‌ర్మ‌కు చాలా మంచి పేరు ఉంది. ఆయ‌న ఇటీవ‌ల అఖిల్‌కు విలేజ్ బ్యాక్‌డ్రాప్‌లో ఓ క‌థ చెప్పార‌ట‌. ఆ క‌థ అఖిల్‌కు బాగా న‌చ్చింది. పైగా అందులో థ్రిల్లింగ్ అంశాలు కూడా చాలానే ఉన్నాయి. దానికి తోడు ఈ సినిమాలో నాయిక కూడా విలేజ్ బ్యాక్‌డ్రాప్‌లో పెరిగిన అమ్మాయేన‌ట‌.

హీరోయిన్ల ప‌రంగా ల‌క్కుకోసం వెతుక్కుంటున్న అఖిల్‌, ఆ సినిమాలో మ‌రో స‌క్సెస్‌ఫుల్ హీరోయిన్ నివేదా థామ‌స్‌ను ఎంపిక చేసుకున్నారు. తొలి సినిమా జెంటిల్‌మేన్‌, నిన్నుకోరి, జైల‌వ‌కుశ‌, బ్రోచేవారెవ‌రురా... ఇలా నివేదా థామ‌స్ కూడా ప‌ట్టింద‌ల్లా బంగారం అయిపోతోంది. దానికి తోడు విలేజ్ కేర‌క్ట‌ర్ కావ‌డంతో ఆమె చ‌క్క‌గా స‌రిపోతుంద‌ని యూనిట్ భావించింద‌ట‌. అందుకే ఆమె అప్రోచ్ అయిన‌ట్టు స‌మాచారం. ఈ ఏడాది చివ‌ర్లో ఈ సినిమాను సెట్స్ మీద‌కు తీసుకెళ్లి వ‌చ్చే ఏడాది విడుద‌ల చేయాల‌న్న‌ది ప్లాన్‌.