'జెంటిల్‌మన్', 'నిన్నుకోరి', 'జై లవకుశ' చిత్రాల‌తో హ్యాట్రిక్ విజయాలను తన ఖాతాలో వేసుకుంది కేర‌ళ‌ కుట్టి నివేదా థామస్. అయితే వరుస విజయాలతో పాటు.. వరుస అవకాశాలు వచ్చినా చదువు కోసం సినిమాల్లో నటించడానికి కొంత గ్యాప్ తీసుకుంది. ఇప్పుడు చదువు పూర్తవడంతో మళ్ళీ సినిమాలపై దృష్టి సారించింది ఈ మలబారు సుందరి.

అందులో భాగంగా.. నందమూరి కళ్యాణ్ రామ్ హీరోగా, ప్రముఖ సినిమాటోగ్రాఫర్ కె.వి.గుహన్ దర్శకత్వంలో రూపుదిద్దుకుంటున్న ఓ సినిమాలో నటించడానికి తాజాగా గ్రీన్ సిగ్నల్ ఇచ్చేసింది నివేదా. ఈ సినిమాలో ఈమెతో పాటు 'అర్జున్ రెడ్డి' ఫేమ్ షాలిని పాండే కూడా నటించనుంది. కాగా.. ఈ చిత్రంలో నివేదా హీరోయిన్‌గా కాకుండా కథను మలుపు తిప్పే పాత్రలో నటిస్తోందని తెలిసింది.

కథలో.. నివేదా పాత్ర ఎంట‌రయిన త‌ర్వాతే సినిమా ఆసక్తికరంగా ఉంటుందని తెలుస్తోంది. మంచి గ్రిప్పింగ్‌తో సాగే ఈ కథలో నివేదా పాత్ర చాలా కీలకమని చెబుతున్నారు. ఇప్పటివ‌ర‌కు హీరో పాత్ర‌ల‌కు ఏ మాత్రం త‌గ్గ‌ని లీడ్ రోల్స్‌ చేస్తూ వచ్చిన నివేదా.. ఈ సారి నందమూరి వారసుడి సినిమాలోనూ అదే త‌ర‌హా లీడ్ రోల్ పాత్ర పోషిస్తున్నట్టు సమాచారం.