నితిన్ ఖాతాలో... ఆ హిట్ చిత్రం!
- IndiaGlitz, [Sunday,September 01 2019]
టాలీవుడ్‌లో ద మోస్ట్ ఎలిజిబుల్ బ్యాచ్‌ల‌ర్ నితిన్. డిస్ట్రిబ్యూటర్ కొడుకుగా, ప‌వ‌న్ క‌ల్యాణ్ ఫ్యాన్‌గా ఆయ‌న ఇండ‌స్ట్రీలో అడుగుపెట్టారు. తాజాగా ఆయ‌న వెంకీ కుడుముల ద‌ర్శ‌క‌త్వంలో 'భీష్మ', చంద్ర‌శేఖ‌ర్ ఏలేటి ద‌ర్శ‌క‌త్వంలో ఓ సినిమా, వెంకీ కుడుముల ద‌ర్శ‌క‌త్వంలో రంగ్ దేలో న‌టిస్తున్నారు. దీని త‌ర్వాత ఆయ‌న లిరిసిస్ట్ కృష్ణ చైత‌న్య ద‌ర్శ‌క‌త్వంలో ఓ సినిమా చేయ‌నున్నారు. ఆ సినిమా క‌థ ఒరిజిన‌ల్ స్టోరీ కాద‌నీ, రీమేక్‌గా రూపొందే అవ‌కాశాలు ఎక్కువ‌గా ఉన్నాయ‌నీ వార్త‌లు వినిపిస్తున్నాయి. ఈ సినిమాను ఆయ‌న సొంత సంస్థ శ్రేష్ట్ మూవీస్ తెర‌కెక్కించ‌నుంద‌ని వినికిడి. ఈ సినిమా కోసం ఆయ‌న అంధాదున్ రీమేక్ రైట్స్ ను సొంతం చేసుకున్నార‌ట.
నిజానికి అందాదున్ రీమేక్ కోసం ర‌వితేజ, నాని, అడివి శేష్‌, నితిన్ ఇంట్ర‌స్ట్ చూపించారు. ఏషియ‌న్ సునీల్‌, అభిషేక్ నామా, కోనేరు స‌త్య‌నారాయ‌ణ రీమేక్ రైట్స్ కోసం పోటీ ప‌డ్డార‌ని కూడా వార్త‌లు వ‌చ్చాయి. వీరంద‌రిలోకీ నితిన్ ఫ్యాన్సీ ప్రైస్ ఇచ్చి ఈ సినిమాను సొంతం చేసుకున్నారు. 2020 మ‌ధ్య‌లో ఈ సినిమా తెర‌పైకి వెళ్లే అవ‌కాశాలున్నాయి. ఆయ‌న న‌టించే 'భీష్మ', 'రంగ్ దే' చిత్రాలు పూర్త‌య్యేవ‌ర‌కు ఈ సినిమా సెట్స్ మీద‌కు వెళ్ల‌దు. అప్ప‌టిదాకా తెలుగు నేటివిటీకి త‌గ్గ‌ట్టు అందాదున్‌లో మార్పులూ చేర్పులూ చేస్తారు. నితిన్ తండ్రి సుధాక‌ర్ రెడ్డి, వ‌యాకామ్ 18 మోష‌న్ పిక్చ‌ర్స్ తో క‌లిసి నిర్మించ‌నున్నారు.
ఈ సినిమాను త‌మిళంలో ప్ర‌శాంత్ హీరోగా తెర‌కెక్కించ‌నున్నారు. ఆయ‌న తండ్రి త్యాగ‌రాజ‌న్ ఈ సినిమాను నిర్మిస్తున్నారు. గ‌త కొంత‌కాలంగా స‌రైన హిట్ లేక‌పోవ‌డంతో ప్ర‌శాంత్ మంచి స్క్రిప్ట్ కోసం చూస్తున్నారు. ఈ స్క్రిప్ట్ ప్ర‌శాంత్‌కు ప‌క్క‌గా స‌రిపోతుంద‌ని త్యాగ‌రాజ‌న్ న‌మ్మ‌కం. అందుకే ఆయ‌న ఈ హ‌క్కుల‌ను తీసుకున్నారు. జాతీయ అవార్డుల్లో అందాదున్‌కు వ‌చ్చిన ప్ర‌శంస‌ల సంగ‌తులు తెలిసిందే.