అలా మొదలైంది` సినిమాతో తెలుగు పరిశ్రమలో అడుగుపెట్టిన టాలెంటెడ్ హీరోయిన్ నిత్యా మీనన్. ఇష్క్`, గుండెజారి గల్లంతయ్యిందే`, మళ్ళీ మళ్ళీ ఇది రాని రోజు` సినిమాలతో న‌టిగా తానేంటో నిరూపించుకుంది ఈ కేర‌ళ‌కుట్టి.

అయితే.. ఆ త‌రువాత మాత్రం ఆమెకి తెలుగులో మంచి అవకాశాలు రాలేదనే చెప్పాలి. వచ్చిన ఆఫర్స్ కూడా సెకండ్ హీరోయిన్ గానే వస్తున్నాయి. సుధీర్ వర్మ డైరెక్షన్లో, శర్వానంద్ హీరోగా ఒక సినిమా చేస్తున్న విషయం తెలిసిందే.

సితార ఎంటర్‌టైన్‌మెంట్స్ ప‌తాకంపై సూర్యదేవర నాగవంశీ నిర్మిస్తున్న ఈ సినిమా ఇటీవలే పూజా కార్యక్రమాలు జరుపుకుంది. ఈ మూవీలో మొదటిసారిగా ద్విపాత్రాభినయం చేస్తున్నారు శర్వానంద్. కాజల్ అగర్వాల్, నిత్య మీనన్ హీరోయిన్లు అని సినిమా ప్రారంభోత్స‌వం రోజు చెప్పారు. కాగా, ఇప్పుడు నిత్య ఈ ప్రాజెక్ట్ నుంచి తప్పుకుంద‌ని వార్త‌లు వినిపిస్తున్నాయి. పారితోషికం విష‌యంలో స‌మ‌స్య వ‌ల్లే నిత్యా త‌ప్పుకుంద‌ని తెలిసింది. ఆమె పారితోషికం విషయమై గత కొన్ని రోజులుగా చర్చలు జరుగుతూనే ఉన్నాయ‌ట‌. ఆమె అడిగిన పారితోషికాన్ని నిర్మాతలు ఇవ్వలేకపోవడంతో ఈ సినిమా నుంచి నిత్య తప్పుకుంద‌ని టాలీవుడ్ వ‌ర్గాలు పేర్కొంటున్నాయి. ఇప్పుడు ఆమె స్థానంలో వేరే హీరోయిన్ కోసం వెతుకులాటకు సిద్ధమయ్యింది చిత్ర బృందం.

ప్రస్తుతం నాని నిర్మిస్తున్న అ!` సినిమాలో నిత్య ఒక కీలక పాత్ర పోషిస్తోంది. ఈ సినిమాని ఫిబ్రవరిలో విడుదల చేయడానికి సన్నాహాలు జరుగుతున్నాయి.