ప్రముఖ నటుడు, జనసేన అధినేత పవర్ స్టార్ పవన్ కల్యాణ్‌కు హీరో నితిన్ వీరాభిమాని, భక్తుడు అనే విషయం తెలిసిందే. పవన్ ఎంత బిజీగా ఉన్నప్పటికీ నితిన్ సినిమాలకు, ఫంక్షన్‌లకు కచ్చితంగా వచ్చేవారు. అలా ఇద్దరి మధ్య మంచి స్నేహబంధాలు ఉండేవి. పవన్ రాజకీయాల్లోకి వెళ్లిన తర్వాత కాసింత గ్యాప్ వచ్చిందంతే.! అయితే తాజాగా జనసేన పార్టీకి హీరో నితిన్ తనవంతుగా రూ.25 లక్షల విరాళం ఇచ్చారు.

వివరాల్లోకెళితే.. సోమవారం రాత్రి భీమవరంలో జనసేన అధినేత పవన్ కల్యాణ్‌ను నితిన్ తండ్రి, నిర్మాత ఎన్. సుధాకర్ రెడ్డి కలిసి చెక్ అందచేశారు. డీ హైడ్రేషన్‌తో అస్వస్థతకు లోనైన పవన్ ఆరోగ్యం గురించి అడిగి తెలుసుకున్నారు. ఈ సందర్భంగా పవన్ మాట్లాడుతూ.. "సోదరుడు నితిన్ నా ఆరోగ్యం గురించి వాకబు చేసినందుకు సంతోషంగా ఉంది. ఎంతో అభిమానంగా జనసేనకు విరాళం పంపించారు. నితిన్‌కు, సుధాకర్ రెడ్డికి కృతజ్ఞతలు" అని పవన్ చెప్పుకొచ్చారు. కాగా ఇప్పటికే మెగా ఫ్యామిలీ నుంచి నాగబాబు, వరుణ్ తేజ్ విరాళం ఇచ్చిన విషయం తెలిసిందే.