దేశ రాజధాని ఢిల్లీలో జరిగిన అతి భయంకరమైన నిర్భయ కేసులో ఎట్టకేలకు నలుగురు దోషులకు ఉరి శిక్ష ఖరారైపోయింది. ఇప్పటికే డెత్ వారెంట్లు జారీ అవ్వగా.. దోషులు సుప్రీంకోర్టు, రాష్ట్రపతిని ఆశ్రయిండంతో కాస్త లేట్ అయ్యింది. అయితే కోర్టులన్నీ షాకివ్వడంతో ఆశలు అన్నీ ఆవిరైపోయాయి. మరోవైపు.. గురువారం కూడా న్యాయపరమైన అవకాశాలు ఉన్నాయంటూ నిర్భయ దోషులు పిటిషన్లు దాఖలు చేయగా.. వాటిని ఢిల్లీ పటియాలా హౌస్ కోర్టు షాకిచ్చింది. ఇలా కోర్టులు, రాష్ట్రపతి నుంచి వరుస షాకులివ్వడంతో ఉరికి మార్గాలు సుగుమయ్యాయి. కాగా.. శుక్రవారం ఉదయం 5.30 గంటలకు నలుగురు దోషులను తలారీ ఉరి తీయనున్నారు.

ఇవాళ కోర్టులో ఏం జరిగింది!?

పవన్ గుప్తా దాఖలు చేసిన రెండో క్షమాభిక్ష పిటిషన్, సుప్రీంలో అతడు దాఖలు చేసిన క్యూరేటివ్ పిటిషన్ పెండింగ్‌లో ఉన్నాయని.. తిహార్ జైలు సిబ్బందిపై పవన్ ఫిర్యాదు చేశాడని.. అక్షయ్ భార్య విడాకులు కోరుతూ బిహార్ కోర్టులో పిటిషన్ దాఖలు చేసిందని.. తన క్షమాభిక్ష పిటిషన్ తిరస్కరణలో అవకతవకలు చోటు చేసుకున్నాయని ఆరోపిస్తూ వినయ్ ఢిల్లీ హైకోర్టులో రిట్ పిటిషన్ దాఖలు చేశాడు. ఇందుకు పబ్లిక్ ప్రాసుక్కూటర్ మాట్లాడుతూ.. న్యాయపరమైన అవకాశాలు ఇంకేమీ మిగల్లేదని.. పవన్, అక్షయ్ మళ్లీ దాఖలు చేసిన క్షమాభిక్ష పిటిషన్లను కూడా రాష్ట్రపతి తిరస్కరించారు. నా స్నేహితుడితో 100 పిటిషన్లు వేయించగలననన్నారు. అలాంటి పిటిషన్లను కూడా న్యాయపరమైన అవకాశాలుగా భావిస్తామంటే ఎలా? అంటూ ఇర్ఫాన్ అహ్మద్ కోర్టులో వాదనలు వినిపించారు.

స్పృహ తప్పిన అక్షయ్ భార్య..

ఇదిలా ఉంటే.. కోర్టులో వాదనలు జరుగుతున్న సమయంలో నిర్భయ దోషి అక్షయ్ భార్య ఒక్కసారిగా స్పృహతప్పి కిందపడిపోయింది. దాంతో అక్కడ కాసేపు కలకలం రేగింది. ఆమె కొన్నిరోజుల కిందటే తన భర్త నుంచి విడాకులు కోరుతూ డైవోర్స్ పిటిషన్ దాఖలు చేసింది. ఇక, ఢిల్లీ కోర్టు కూడా దోషుల పిటిషన్లను తిరస్కరించడంతో, ఇక రేపు వారి ఉరి ఖాయమేననిపిస్తోంది. శుక్రవారం ఉదయం 5.30 గంటలకు నలుగురునిందితులకు మరణశిక్ష అమలు చేయనున్నారు. మరి ఇవాళ సాయంత్రం కల్లా ఇంకా ఈ కేసులో ఎన్నెన్ని ట్విస్ట్‌లు ఉంటాయో వేచిచూడాల్సిందే.

ఇదీ గతం..!

ఢిల్లీలోని పారామెడికల్ విద్యార్థిని నిర్భయపై దక్షిణ ఢిల్లీలో ప్రాంతంలో ముకేష్ సింగ్ (32), పవన్ గుప్తా (25), వినయ్ శర్మ (26), అక్షయ్‌కుమార్ సింగ్ (31) అత్యంత దారుణంగా అత్యాచారానికి పాల్పడి ఆమె మరణానికి కారమైన విషయం విదితమే. 2012 డిసెంబర్ 16న అర్ధరాత్రి సమయంలో ఈ ఘటన చోటుచేసుకుంది. కదులుతున్న బస్సులో ఆరుగురు వ్యక్తులు ఆమెపై అఘాయిత్యానికి పాల్పడ్డ ఘటన అప్పట్లో కలకలం రేపింది.