అక్కినేని హీరోతో 'నిన్నుకోరి' దర్శకుడు?
- IndiaGlitz, [Wednesday,January 24 2018]
తొలి చిత్రం నిన్నుకోరి'తో ప్రేక్షకుల ఆద‌ర‌ణ‌తో పాటు విమర్శకుల ప్రశంసలను సైతం అందుకున్న దర్శకుడు శివ నిర్వాణ. అలాగే ఆ చిత్ర నిర్మాతకు లాభాలను తెచ్చిపెట్టారు. ప్రస్తుతం తన రెండో చిత్రం ప‌నుల‌తో ఈ యువ దర్శకుడు బిజీగా ఉన్నార‌ని టాలీవుడ్ వ‌ర్గాలు పేర్కొంటున్నాయి. ఇప్ప‌టికే తన రెండవ సినిమాను అక్కినేని వారి అబ్బాయి నాగ చైతన్యతో చేయాలని ఫిక్స్ అవ్వడం...ఆ క్రమంలో చైతుకి కథను వినిపించడం....ఆ వెంటనే చైతు నుంచి గ్రీన్ సిగ్నల్ రావడం...అన్నీ చకచకా జరిగిపోయాయ‌ని తెలుస్తోంది. అయితే ఈ కథకి తుది మెరుగులు దిద్దడం కోసం ప్రముఖ రచయిత కోన వెంకట్ సాయం తీసుకుంటున్నారు ఈ దర్శకుడు. వచ్చే నెలకల్లా ఈ చిత్రానికి సంబంధించిన ఫైనల్ రిపోర్ట్ వచ్చే అవకాశాలున్నాయి.
ఇదిలా వుంటే...నిన్నుకోరి' సినిమాని నిర్మించిన డి.వి.వి.దానయ్య ఈ చిత్రాన్ని కూడా నిర్మిస్తున్నారు. ప్రస్తుతం చైతు సవ్యసాచి' మూవీలో నటిస్తున్నారు. ఈ సినిమా చిత్రీకరణ తుదిద‌శ‌కు చేరుకుంది. నిర్మాణానంతర పనులను పూర్తి చేసి మార్చిలో విడుదల చేయడానికి నిర్మాతలు ప్లాన్ చేస్తున్నారు. ఇటీవలే షూటింగ్ ప్రారంభమైన శైలజా రెడ్డి అల్లుడు' మూవీలో కూడా చైతు నటిస్తున్న సంగతి తెలిసిందే. అను ఇమ్మాన్యుయేల్ కథానాయికగా నటిస్తున్న ఈ చిత్రానికి మారుతి దర్శకత్వం వహిస్తున్నారు. ఈ సినిమాల తదనంతరం చైతు.. శివ నిర్వాణ డైరెక్షన్‌లో న‌టించే అవ‌కాశం ఉంది. అలాగే విక్ర‌మ్ కుమార్‌తోనూ ఓ సినిమా చేయ‌బోతున్నారు చైత‌న్య.