నిఖిల్ నిరీక్ష‌ణ‌కు తెర
- IndiaGlitz, [Saturday,October 26 2019]
యంగ్ హీరో నిఖిల్ క‌థానాయ‌కుడిగా ప్ర‌ముఖ నిర్మాత ఠాగూర్ మ‌ధు స‌మ‌ర్ప‌ణ‌లో.. బ్యాన‌ర్‌పై టి.సంతోష్ ద‌ర్శ‌క‌త్వంలో రాజ్‌కుమార్ అకెళ్ల నిర్మించిన యాక్ష‌న్ థ్రిల్ల‌ర్ 'అర్జున్ సుర‌వ‌రం'. దీపావ‌ళి సంద‌ర్భంగా ఈ సినిమా రిలీజ్ డేట్‌ను చిత్ర యూనిట్ అధికారికంగా ప్ర‌క‌టించింది. అన్ని కార్య‌క్ర‌మాల‌ను పూర్తి చేసుకున్న ఈ చిత్రం విడుద‌ల విష‌యంలో కొన్ని స‌మ‌స్య‌ల‌ను ఎదుర్కొంది. ఈ నిరీక్ష‌ణ‌కు తెర‌ప‌డింది. న‌వంబ‌ర్ 29న ఈ సినిమాను విడుద‌ల చేస్తున్న‌ట్లు నిర్మాత‌లు ప్ర‌క‌టించారు.
నిఖిల్ స‌ర‌స‌న లావ‌ణ్య త్రిపాఠి జంట‌గా న‌టించింది. పోసాని కృష్ణ‌ముర‌ళి, సత్య, త‌రుణ్ అరోరా ప్ర‌ధాన పాత్ర‌ల్లో న‌టించారు. సామ్ సి.ఎస్ సంగీతం అందించిన ఈ చిత్రానికి సూర్య సినిమాటోగ్ర‌ఫీ అందించారు. ఈ సినిమా టీజ‌ర్‌కు చాలా మంచి రెస్పాన్స్ వ‌చ్చింది.
నిజానికి ఈ చిత్రాన్ని ఈ ఏడాది మే 1నే విడుద‌ల చేయాల‌నుకున్నారు నిర్మాత‌లు. అయితే అప్పుడు అవెంజ‌ర్స్ రిలీజ్‌కు రావ‌డంతో సినిమా వాయిదా ప‌డింది. అక్క‌డ నుండి సినిమా వాయిదాల మీద వాయిదాలు ప‌డుతూనే ఉంది. మంచి రిలీజ్ డేట్ కోసం ఎదురు చూసిన యూనిట్ చివ‌ర‌కు న‌వంబ‌ర్ 29న సినిమాను ప్రేక్ష‌కుల ముందుకు తీసుకురావాల‌ని నిర్ణ‌యించారు. త‌మిళ చిత్రం క‌ణిత‌న్ సినిమాకు ఇది రీమేక్‌.
ఈ సినిమా త‌ర్వాత నిఖిల్ వెంట‌నే మ‌రో సినిమాను స్టార్ట్ చేయ‌లేదు. త‌న హిట్ చిత్రం కార్తికేయ‌కు సీక్వెల్‌గా కార్తికేయ 2ను తెరకెక్కించే ప‌నిలో బిజీగా ఉన్నాడు. ఈ చిత్రానికి చందు మొండేటి ద‌ర్శ‌కుడు.