యువ హీరో నిఖిల్ త్వ‌ర‌లోనే ఓ ఫ్యాంట‌సీ సినిమాలో న‌టించ‌బోతున్నాడని సినీవ‌ర్గాల స‌మాచారం. వివ‌రాల్లోకెళ్తే.. ద‌ర్శ‌కుడు విఐ.ఆనంద్ ఈ సినిమాను డైరెక్ట్ చేస్తాడ‌ని వార్త‌లు విన‌ప‌డుతున్నాయి. అల్లుశిరీశ్‌తో వి.ఐ.ఆనంద్ `ఒక్క క్ష‌ణం` సినిమా తీసిన సంగతి తెలిసిందే. ఆ స‌మ‌యంలో గీతాఆర్ట్స్ బ్యాన‌ర్‌లో బ‌న్నీతో కూడా వి.ఐ.ఆనంద్ సినిమా చేయ‌డానికి క‌థ‌ను వినిపించాడు.

బన్నీకి కూడా క‌థ న‌చ్చింద‌ట‌. అయితే ఆయ‌న క‌థ డెవ‌ప‌ల్ చేసే స‌మ‌యంలో టైమ్ ప‌ట్టింది. ఈలోపు బ‌న్నీ త‌దుప‌రి ప్రాజెక్ట్స్‌తో బిజీ కావ‌డంతో ఆనంద్‌కు బ‌న్నీతో సినిమా చేసే అవ‌కాశం లేక‌పోయింది. ఇప్పుడు ఆ క‌థే నిఖిల్ ద‌గ్గ‌ర‌కు వెళ్లింది. గీతాఆర్ట్స్ బ్యాన‌ర్‌పై వి.ఐ.ఆనంద్ ఈ సినిమాను చేయ‌బోతున్నాడ‌ట‌. ఇదొక సోషియో ఫాంట‌సీ క‌థ‌. ఇప్ప‌టికే క‌థ లాక్ అయ్యింద‌ని టాక్‌.

నిఖిల్ ఈ శుక్ర‌వారం `అర్జున్ సురవ‌రం` చిత్రంతో ప్రేక్ష‌కుల ముందుకు వ‌చ్చాడు. ఈ సినిమా మంచి రెస్పాన్స్‌ను రాబ‌ట్టుకుంది. చాలా రిలీజ్ స‌మ‌స్య‌ల‌ను ఎదుర్కొన్న త‌ర్వాత నిఖిల్ `అర్జున్ సుర‌వ‌రం` సినిమా విడుద‌లైంది.