மானாமதுரையில் புதிய தமிழகம் சார்பில் போட்டியிட வேட்புமனு தாக்கல் செய்தார் அம்மாவட்ட செயலாளர் ராஜையா. ஆனால் இவரது விண்ணப்பத்தோடு ஏ.பி. படிவம் வழங்காததால் வேட்பாளர் சுயேட்சை வேட்பாளராக போட்டியிடுவார் எனத் தேர்தல் அலுவலர் கூறியிருந்தார். இந்நிலையில் அக்கட்சியின் தலைவர் கிருஷ்ணமூர்த்தியுடன் ஏற்பட்ட அதிருப்தியால் தற்போது ராஜையா புதிய தமிழகம் கட்சிக்கு தனது ஆதரவை கொடுக்காமல் அதிமுகவிற்கு ஆதரவு வழங்கி இருப்பதாகத் தகவல் வெளியாகி உள்ளது.

கடந்த சில மாதங்களுக்கு முன்பு இப்பகுதியில் தேவேந்திரகுல மக்களுக்கு இருந்து வந்த கோரிக்கைகளை ஏற்று அவர்களை வேளாளர் பட்டியலில் இணைத்தார் தமிழக முதல்வர். இந்த நடவடிக்கைக்கு நன்றி தெரிவிக்கும் வகையில் இவர் அதிமுகவிற்கு ஆதரவு வழங்கி இருப்பதாகக் கூறப்படுகிறது.

தமிழகத்தில் தனித்து போட்டியிடும் புதிய தமிழகம் கட்சி தற்போது முதல்வர் வேட்பாளராக கிருஷ்சாமியை அறிவித்து தேர்தலில் போட்டியிடுகிறது. இந்நிலையில் அக்கட்சியில் இருந்து விலகி மானாமதுரை வேட்பாளர் அதிமுகவிற்கு ஆதரவு வழங்கி இருக்கிறார். இதனால் மானாமதுரை பகுதியில் அதிமுகவிற்கு வலிமை அதிகரித்து இருப்பதாக அதிமுக நிர்வாகிகள் மற்றும் தொண்டர்கள் சார்பில் கருத்துக் கூறப்பட்டு வருகிறது.