தளபதி விஜய் அரசியலுக்கு வருவதாக இன்னும் அதிகாரப்பூர்வமாக அறிவிக்கவில்லை என்றாலும் அதற்கான பணிகள் நடைபெற்று வருவதை பார்க்கும் போது அவர் விரைவில் அரசியலில் குதிப்பார் என்று எதிர்பார்க்கப்படுகிறது.

ஏற்கனவே தமிழகத்தில் உள்ள 234 தொகுதிகளிலும் 10ம் வகுப்பு மற்றும் 12ம் வகுப்பில் முதல் மூன்று இடங்களை பெற்ற மாணவ மாணவிகளை நேரில் அழைத்து கவுரவித்த விஜய் அடுத்த கட்டமாக தலைவர்களின் சிலைகளுக்கு மாலை அணிவித்து மரியாதை செய்தல் உள்ளிட்ட செயல்பாடுகளை செய்து வருகிறார். மேலும் அவ்வப்போது அவர் ரசிகர் மன்ற நிர்வாகிகளை சந்தித்து ஆலோசனை நடத்தி வருவதாகவும் செய்திகள் வெளியாகி உள்ளன.

இந்த நிலையில் தற்போது விஜய் மக்கள் இயக்கத்தில் வழக்கறிஞர் பிரிவு புதிதாக உருவாக்கப்பட இருப்பதாக தகவல் வெளியாகி உள்ளது. இதற்கான பணிகளை விஜய் மக்கள் இயக்கத்தின் மாநில பொதுச் செயலாளர் புஸ்ஸி ஆனந்த் ஈடுபட்டு வருவதாகவும் வழக்கறிஞர் பிரிவின் முதல் கூட்டம் சென்னையில் ஆகஸ்ட் 5 மற்றும் 6ஆம் தேதி நடைபெற இருப்பதாகவும் தகவல் வெளியாகியுள்ளன. இதுவரை மாவட்ட நிர்வாகிகள் சந்திப்பு மட்டுமே நடந்துள்ள நிலையில் தற்போது புதிதாக அமைக்கப்பட இருக்கும் வழக்கறிஞர் பிரிவு நிர்வாகிகளுடன் ஆலோசனை நடைபெற உள்ளது.

அதுமட்டுமின்றி தமிழகம் முழுவதும் மாவட்ட வாரியாக 234 சட்டமன்ற தொகுதி நிர்வாகிகள் மற்றும் பூத் கமிட்டி அமைப்பது குறித்தும் புஸ்ஸி ஆனந்த் ஆலோசனை செய்து வருவதாக கூறப்படுகிறது.