'நெருப்புடா'வை அடுத்து ஆட்டுக்குட்டி பாடலில் அருண்காமராஜ்
- IndiaGlitz, [Thursday,August 25 2016]
சூப்பர்ஸ்டார் ரஜினிகாந்த் நடித்த 'கபாலி' படத்தில் நெருப்புடா' என்று தொடங்கும் ஒரே ஒரு பாடலை பாடியதன் மூலம் உலகப்புகழ் பெற்ற பாடகர் அருண்காமராஜூக்கு 'கபாலி'க்கு அடுத்து பாடுவதற்கும், பாடல்கள் எழுதுவதற்கும் நிறைய வாய்ப்புகள் குவிந்து வருகின்றது. இருப்பினும் அவர் அனைத்து வாய்ப்புகளையும் ஏற்றுகொள்ளாமல் குறிப்பிட்ட வாய்ப்புகளை மட்டுமே ஏற்று அதில் கவனம் செலுத்தி வருகிறார்.
இந்நிலையில் சமீபத்தில் அவர் ஏற்றுக்கொண்டது ஒரு ஆட்டுக்குட்டி பாடல். அறிமுக இயக்குனர் சரவணன் இயக்கும் 'மரகத நாணயம்' என்ற படத்தில் ஆதி, நிக்கி கல்ராணி நடித்து வருகின்றனர். இந்த படத்திற்காக அருண்காமராஜ் ஒரு பாடலை எழுதி பாடவுள்ளார்.
ஆட்டுக்குட்டியை மையமாக வைத்து எழுதப்பட்டுள்ள இந்த பாடலில் ஆட்டின் வித்தியாசமான குரல்களும் அடங்கியிருக்கின்றதாம். இந்த பாடலை எழுதியுள்ள அருண்காமராஜ், பாடலின் ஒவ்வொரு வரியின் முடிவிலும் ஆடு என்ற வார்த்தை இருக்கும்படி அமைத்துள்ளராம். இந்த பாடலை பிரபல பாடகர் ஒருவருடன் இணைந்து அருண்காமராஜ் பாடவுள்ளதாகவும் இந்த பாடல் 'நெருப்புடா' பாடல் போல் நிச்சயம் சூப்பர் ஹிட் ஆகும் என்று எதிர்பார்ப்பதாகவும் படக்குழுவினர் தெரிவித்துள்ளனர்.